پارتیا ماف و ئازادیان (ھاک-پار) و حەرەکەتا ئازادیێ بریارا یەکبوونێ دا. حەرکەتا ئازادی ژ نھا و پێ دە دێ ئاڤاھیا خوەیا سازیبوونێ بقەدینە و ھەموو خەباتکارێن وێ، دێ خەباتێن خوەیێن سیاسی د ھاک-پارێ دە بدۆمینن.
سەرۆکێ ھاک-پارێ دوزگون کاپلان و سەکرەتەرێ گشتی حەرەکەتا ئازادیێ مەتین پیرانی ئیرۆ 24 تەباخا 2024 ل دیاربەکرێ د داخویانیەکا ھەڤپار دە بریارا یەکبوونا خوە راگھاند.
داخویانیا ھەڤپار وھایە:
ئەم ئیرۆ ل سەر ناڤێ تەڤگەرا ئازادی و پارتیا ماف و ئازادیان ژ بۆ کو مزگینیێ ب وە رە پارڤە بکن کۆم بوون.
وەک ھوون ژی دزانن د سەر پەیمانا لۆزانێ رە 100 سال دەرباس بوون. دەما کو کۆمارا ترکیەیێ ل شوونا دەولەتا عۆسمانی یا پرنەتەوەیی و پرچاندی ھات ئاڤاکرن، قەدەرا کوردان نەگوھەری، پشتی شەرێ جیھانێ یێ یەکەمین، گەلەک ملەتان دەولەتێن خوە ئاڤا کرن، لێ کوردان، کو ملەتێ ھەری کەڤنارێ رۆژھلاتا ناڤینە، ژ مافێ چارەنووسێ بێپار بوون. وەلاتێ وان، د ناڤ دەولەتێن کو د بن سیوانا ئینگلیستان و فرانسایێ دە ھاتبوون ئاڤاکرن دە ھاتبوو پارڤەکرن. گەلێ کورد د جارەکێ دە ژ ھەموو مافێن خوەیێن ھەری بنگەھین و رەوا ژی بێپار ھات ھشتن. ب ئاسیمیلاسیۆنەکا گران رە، ب کۆمکوژی و پێکانینێن قرکرنێ رە روو ب روو مان.
ھەلبەت سەدەما بنگەھینا ڤێ رەوشێ پۆلیتیکایێن دەولەتێن مەزنێن ئەمپەریالیست بوو کو تەنێ ل گۆری بەرژەوەندیێن خوە تەڤدگەریان.
لێ دیارە کو پرانیا چینا سیاسی یا کوردێن وێ سەردەمێ، ژ بلی ئیستسنایان، پارا خوە د ڤێ ئەنجاما نەرینی دە ھەبوو.
ھەم د سەردەما داوین یا ئیمپاراتۆریا عۆسمانی دە و ھەم ژی د پێڤاژۆیێن دامەزراندنا کۆمارا ترکیەیێ دە، ل شوونا کو کوردان ب رێخستن بکن و تێکۆشینا ژ بۆ مافێن خوەیێن کۆلەکتیف و ل گۆری روحا سەردەمێ ستراتەژیەکا راست بشۆپینن، وان ل گۆری ئاژاندایێن کو ژ ئالیێ دەولەتا ترک ڤە ھاتنە چێکرن دە جھ گرتن؛ بوونە ئالیگرێ ناکۆکیێن ھێزێن دەستھلاتدار و بوونە سەدەما بێستاتووییا ئیرۆیین.
ئەم ب مخابنی دبینن کو ڤێرژنێن ئیرۆیین یێن سیاسەتمەدارێن کورد کو بەرێ ھێز و ئەنەرژیا خوە ژ بۆ سلتان یان ژی ژ بۆ ئیتتیحاد و تەرەقی خەرج کرنە، ئیرۆ ژی خەلەتیەکا سیاسی یا ب ڤی رەنگی دکن و د شەرێ دەستھلاتداریێ یێن ناڤخوەیی دە جھ دگرن. پارتیێن لایک یان کەڤنەپەرەست، کو بەردەوامیا ئیتتیحات و تەرەقی نە، د ھەستێن دژە کورد دە بوونە یەک.
دڤێت ئەڤ رەوش وەرە گوھەراندن.
سیاسەتمەدارێن کورد دڤێت ل دۆرا داخوازێن رەوایێن گەلێ کوردێ 30 ملیۆن نفووسی خوە بکن یەک و ل گۆری رۆژەڤا خوە، ل گۆری بەرژەوەندیێن خوەیێن نەتەوی سیاسەتێ بکن.
ب تایبەتی دڤێت چاندا سیاسی یا نەیینی یا سالێن 1970 کو تەڤگەرا کورد پەرچە کر، وەرە دەرباسکرن.
پارتیەکە یاسایی یا خورت کو شیدەتێ ژ ھۆلێ رابکە و ل سەر ئەساسێ تێکۆشینا دەمۆکراتیکا ئاشتیانە بە، دڤێت ب ھەڤ رە بخەبتن، بێیی پێشدارازی و قەربوویان ل ھەڤ گوھداری بکن.
ئەم د وێ باوەریێ دە نە کو ھەر کەس دکارە ب ھەڤ رە ژ بۆ دەمۆکراسی، مافێن مرۆڤان و ئازادیان و ئاشتیێ بخەبتە.
ئەم د وێ باوەریێ دە نە کو ھەر کەسێ کو دفکرە پرسگرێکا ھەری بنگەھینا ترکیەیێ پرسگرێکا کوردە و دڤێت ئەڤ پرسگرێک ل سەر ئەساسێ وەکھەڤیێ بێتە چارەسەرکرن و رەگەزێن خەباتا دەمۆکراتیک قەبوول دکە، دکارن ب ھەڤ رە تەڤبگەرن.
ل گۆرا بیر و رایا مە؛
کادرۆیێن کوردێن وەلاتپارێز، دکارن دەست بدن ھەڤ و پێکڤە بخەبتن
ژ بۆ کو توندیێ ژ ژیانا جڤاکی دەربخن،
ژ بۆ کو ناسنامەیا کورد د دەستوورا بنگەھین دە جھ بگرە
ژ بۆ کو گەلێ کورد ل ئەردنیگاریا کو پرانیا نفووسا خوە پێک تینە، یانی ل کوردستانێ، ب دەولەتەکا فەدەرال خوە ب رێ ڤە ببە،
ئەم دفکرین کو ئەم ب ھەڤ رە کار بکن داکو زمانێ کوردی ل کێلەکا ترکی ببە زمانێ فەرمی و ژ دبستانا سەرەتایی ھەتا زانینگەھێ ببە زمانێ پەروەردەھیێ.
ب ڤێ ئارمانجێ؛
مە ب تەڤگەرا ئازادی و پارتیا ماف و ئازادیێ بریارا یەکبوونێ دا.
حەرەکەتا ئازادی ژ نھا و پێ دە دێ ئاڤاھیا خوە یا سازیبوونێ بقەدینە و ھەموو خەباتکارێن وێ خەباتێن خوەیێن سیاسی د ھاک-پارێ دە بدۆمینن.
ئەمێ ب ھەڤ رە گاڤ ب گاڤ ڤێ پێنگاڤا یەکیتیێ بەرفرەھتر بکن و گاڤ ب گاڤ مەکانیزمایەکا خورتا نوونەرتیا نەتەوەیی یا کو گەلێ مە حەسرەتا وێیە ئاڤا بکن.
بلا پیرۆز بە!
