سەرۆک بارزانی د پەیاما خوە یا ب بۆنەیا 36 سالڤەگەرا ئەنفالا بادینان دە راگھاند: “ئەم پێداگریێ ل سەر مافێن رەوایێن گەلێ خوە دکن. دڤێت ئەڤ تاوانە نەیێن ژبیرکرن و دەولەتا ئیراقێ بەردێلا جینۆساید، تاوان و ھەموو زلم و زۆرداریا کو ل گەلێ مە ھاتیە کرن، بدە.”
سەرۆک مەسعوود بارزانی د پەیاما خوە دە گۆت: “بەری 36 سالان و د 25 تەباخا 1988 و ھەتا 6 ئیلۆنا 1988، د بەردەوامیا زنجیرەیا تاوانێن رەژیما ئیراقێ ل دژی گەلێ کوردستانێ دە، گەلەک ناڤچە و گوندێن دەڤەرا بادینانێ ژ ئالیێ ھێزێن رێژیما وێ دەمێ یا ئیراقێ ڤە، راستی ئێرشێن نەمرۆڤانەیێن کیمیایی، گرتن، کوشتن، کۆچبەرکرن و ئەنفالکرنا وەلاتیێن بێگونەھ، ھاتن.”
سەرۆک بارزانی گۆت ژی، “د ئەنجاما ڤان تاوانێن نەمرۆڤانە دە، ب ھەزاران وەلاتیێن کورد شەھید، وندا و کۆچبەر بوونە و ب سەدان گوند ژی وێران بوون. ئارمانجا تاوانێن رەژیما بەرێ یا ئیراقێ، شکاندنا ئیرادەیا گەلێ کوردستانێ ژ بۆ پشتەڤانیا شۆرەشێ و بەردەوامکرنا سیاسەتا گوھەرتنا دەمۆگرافیا کوردستانێ بوو.”
سەرۆک بارزانی د داویا پەیاما خوە دە ژی گۆت: “د سالڤەگەرا ئەنفالا بادینانێ دە، سلاڤ ل گیانێ پاکێ شەھیدێن ڤێ تاوانێ و ھەموو شەھیدێن کوردستانێ دشینن و ب توندی پێداگریێ ل سەر مافێن رەوایێن گەلێ خوە دکن. نابە ئەڤ تاوان وەرن ژبیرکرن و پێویستە دەولەتا ئیراقێ قەرەبوویا جینۆساید، تاوان و ھەموو زولما کو ل گەلێ مە ھاتیە کرن، بدە.”
