ھێزێن رووسی و ترکی گەرەکە چاڤدێریێ یا ھەڤبەش ل کۆبانێ ئەنجامدا

گەرێن چاڤدێریێ یا رووسیا و ترکیەیێ پشتی نێزیکی سالەکێ ژ راوەستاندنێ، ژ نوو ڤە ل ھەرێما کۆبانێ دەست پێ کرن.

ل گۆری مەدیایا خوەجھی، پشتی نێزیکی سالەکێ ژ راوەستاندنێ ھێزێن پۆلیسێن لەشکەری یێن رووسیایێ و ھێزێن ترکیەیێ ئیرۆ گەرەکە چاڤدێریێ ل کۆبانێ پێک ئانین.

د گەرا کو ژ گوندێ خەریبێ کۆبانێ ھەتا گوندێ خانایێ رۆژھلاتێ باژێر دەست پێ کریە دە، ژ ھەر دو ئالیان 8 وەساییتێن زرخی بەشدار بوون و 2 ھەلیکۆپتەرێن رووسیایێ ژی ژ ئاسمان ڤە چاڤدێری کرن.

ترکیە و رووسیایێ ژ دەستپێکا مژدارا 2019 ڤە دەست ب گەرێن ھەڤبەش کرن، وەک تەدبیرەکێ ژ بۆ شۆپاندنا جیبجیکرنا بەندێن رێکەفتنا “سۆچی 2019” ب تایبەتی مژارا ڤەکشینا شەرڤانێن ھەسەدێ 30 کم ژ سینۆرێ د ناڤبەرا سووریێ و ترکیەیێ دە.

ژ خزیرانا 2023 ڤە گەرێن چاڤدێریێ یێن ھەڤبەشێن رووسی-ترکی ل ھەرێمێ، ژ بەر ئێریشێن گرانێن ترکیەیێ ل سەر رۆژئاڤایێ کوردستانێ و باکورێ رۆژھلاتێ سووریێ ھاتبوون راوەستاندن.