ب دەهان نڤیسکار و رەوشەنبیرێن کورد توندی و تەرۆرا دەولەتا ترکیەیێ و کریار و بنپێکرنێن پارتیا کارکەرێن کوردستانێ په‌كه‌كێ شەرمەزار دکن.
ب دەهان رەوشەنبیر، نڤیسکار و مەدیاکارێن کورد داخویانیەک ب زمانێ کوردی، عەرەبی و ئینگلیزی ژ رایا گشتی و کوردستانی رە بەلاڤ کرن و تێ دە راگهاندن، «ئەم پێویست دبینن کو ل دژی توندی و تەرۆرا دەولەتا ترکیەیێ یا کو کورد و کوردستانێ دکە ئارمانج، دەنگێ خوە بلند بکن».
هەروها د داخویانیێ دە هات گۆتن: «ئەم ل دژی هشمەندی و کریارێن په‌كه‌كێ یێن خیانەت کرنێ و ستەمکاریێ نە، کو جڤاکا کورد ئارمانج دگرە، و ئەم دقیرن و ژ په‌كه‌كێ رە دبێژن: «ئێدی بەسە». ئەڤ هشمەندی و کریارێن په‌كه‌كێ کو جڤاک، مالبات و کەسایەتییا کورد ددە بەر خوە و خەرا دکە، ئەم شەرمەزار دکن».
داخویانیا رەوشەنبیر و نڤیسکارێن کورد وهایە:
داخویانییەک ژ بۆ رایا گشتی و کوردستانی رە
د گەلەک سەردەم و قۆناغێن دیرۆکێ دە، چێبوویە کو رەوشەنبیر، وێژەڤان و هونەرمەند ل سەر هنەک مژار و نەرینان، نە گهیشتنە هەڤ و نه بوونە یەک، و د ناڤ پێل و ئالیێن رامیاری و ئیدیۆلۆژیکی یێن جوور بە جوور دە بەلاڤ بوونە. دبە کو ئەڤ ئالییێن هان؛ ناکۆک و دووری هەڤ بن ژی، لێ قاتا رەوشەنبیری، رۆناکبیری و نڤیسکاری، تشتێ وان دگهینە هەڤ و ئارامانجا وان یا سەرەکە و داخوازا وان یا هەری هەڤبەش، بلند و ب نرخ ئازادییە، و دێ وسا بمینە. ئەو ئازادییا جڤاکی و یان تاکەکەسی کو نەبە مەتۆد و ئالاڤ و بنگەهـ دا کەسێ دن ژ هۆلێ رانەکە، و مافێ وی یێ رەخنەگێری بنپێ نەکە و نه چەوسینە. ئەو ئازادییا کو ئۆکسۆژینا ژیانێ یە و نڤیشک و مسۆگەرییا روومەت و دادوەرییێ یە.
گەلێ کورد، وەکی هەموو گەلێن بندەست، پێویستییا وی ب رزگاری و ئازادییێ پر هەیە، چ د هندرێ وەلات دە، چ ل دەرڤەیی وەلات (دیاسپۆرا) بە، ژ بەر کو کورد ژ بەرێ ڤە و تا نوها ژی، زلم و زۆرێ دبینن و ئێش، ژان و ئازارێن وێ دکشینن،نە ئازادییا ل سەر ئاستا گشتینە یا ل سەر ئاستا تاکەکسی هەیە. هەر وها ئەگەر کورد د رەوشا زلم و زۆرێ و ستەمبارییێ دە بمینن، باش تێ زانین بێ کی سوودە ژ ڤێ رەوشێ وەردگرە. لەورا ژ هەر دەمێ زێدەتر پێویستی ب هەلوەستەکی رەوشەنبیری و رۆناکبیری یەکبوویی، خورت و وێرەک هەیە، و گەلەکی گرینگ کو خوە ددە پێش و ل همبەری فاشیزم و تاریپەرەستییا ئۆلی و یا ئیدیۆلۆژی دەردکەڤە، کو ئەڤ فاشیزم ژییان، روومەت، ئازادی و گەپا نانێ مرۆڤێ کورد ئارمانج دگرە.
ئەم هەموو رەوشەنبیر، وێژەڤان و نڤیسکارێن کو ناڤ و ئیمزەیێن مە ل بنێ ڤێ داخوییانییێ دە هەنە، د خەباتا کوردەوارییێ دە ئەم خوەدی نەرین، پەیڤ، هەلوەست و کەدن، ئەم دبینن کو ژ ئەرک، دەلامەت و پەیوەرا مەیە ئەم دەنگێن خوە بلند بکن و ل دژی تەرۆر و توندییا دەولەتا تورک کو کورد و کوردستانێ دایە بەر خوە، و هەر وسا ئەم ل دژی هشمەندی و کریارێن په‌كه‌كێ یێن خیانەت کرنێ و ستەمکاریێ نە، کو جڤاکا کورد ئارمانج دگرە، و ئەم دقیرن و ژ په‌كه‌كێ رە دبێژن: «ئێدی بەسە». ئەڤ هشمەندی و کریارێن په‌كه‌كێ کو جڤاک، مالبات و کەسایەتییا کورد ددە بەر خوە و خەرا دکە، ئەم شەرمەزار دکن. ئەڤ کریارێن په‌كه‌كێ دگهێژن ئاستا تاوانێن شەر و تاوانێن ل دژ مرۆڤاتیێ نە، ژ رەڤاندنا زارۆکان و چەکدار کرنا وان د ناڤ هێزێن په‌كه‌كێ/ هه‌په‌گێ/ یه‌په‌گێ/ هه‌سه‌دێ… دە بە، و شار و باژار و باژارۆکێن کوردستانێ کرنە زیندان و گۆرستان ل سەر ئەردێ و توونەل ل بن ئەردێ، و هەلوەلاتییێن کورد کرن وەکی مەرتالێن زندی و د شەران دە ب کار تینن، ئەم ڤان کریاران ب توندی شەرمەزار دکن.
پێڤە گرێدایی، هەموو کار و کریارێن رووخاندن و هلوەشگێریێن تەوش، پرۆڤۆکاتیڤ، بێیهۆدە و بێ واتە کو په‌كه‌كه ل هەموو پەرچەیێن کوردستانێ دکە، ئەم رەخنە و شەرمەزار دکن.
د ئەینی دەمێ دە، ئەم وەلاتێ ئەئورۆپا ئاگاهدار دکن کو رێخستنا په‌كه‌كێ، یاسە و قانوون و دەمۆکراسییا ئەورۆپا ئستسمار دکە و ب کار تینە دا کو کار و کریارێن خوەیێن تاوانکار (جرمنالتی) و قرێژ بەردەوام بکە، و باش تێ زانین کو کریارێن په‌كه‌كێ ل دژی زاگۆن، پرەنسب، سنج، ره‌وشت، و پیڤانێن دەمۆکراسیا ئەورۆپینە.
ئەڤ گرووپا پارتیپەرەست و دۆگماتیک کو ناڤێ وێ د لیستەیێن رێخستنێن تەرۆریستیێن دەیە، تا نوها ل ئەئورۆپا و ئامەریکا دەست بەردایی و سەربەستە و ئێریشی کەسێن رکبەر و رەخنەگێران دکە، چ ل سەر ئاستا تاسفیا سیاسی و رەش کرن و خیانەت کرنا وان، و چ ل سەر ئاستا تەسفیەیا فزیکی و راستەقینە و دیرکت بە.
هێژایی گۆتنێیە کو دیرۆکا رێخستنا په‌كه‌كێ د سالێن 80ی و 90ی دە ژ سەدسالا بۆری ڤە، تژە بوویەرێن قرێژیێن کوشتنا رەکبەر و کەسێن ژ په‌كه‌كێ ڤەقەتیانە. ئانگۆ تشتێن ل سەر ڤێ گرووپا چەکدار ئەم دبێژن نە نوونە، و د دادگەهێن وەلاتێن ئەئورۆپا دە هاتنە تەکەز کرن.
ژ ڤێ گرووپا چەکدار رە و هەموو ئالیگرێن وێ و تەڤاهییا سازی و دام و دەزگەهێن گرێدایی وێ، یێن چاندەیی و راگهاندنێ و سییاسی و لەشکەری رە، چ ل وەلات بن یان ژی ل دیاسپۆرا بن، ئەم ژ وان رە دبێژن:
ئەگەر ژ وە هەیە دەنگێن کێر و تفنگێن وە و هشمەندییا خیانەت کرنێ ئا وە بلندە کو دل و مەژییێن وە کۆر کرییە، باش ناس بکن کو دەنگێ ئازادییێ و ئازادیخوازێن کورد بلندتر و ب هێزترە.
دبە کو دەستێن وەیێن قرێژ د وارێ گهیشتنا خوەدییێن نەرین و پەیڤا ئازاد دە سەرکەڤن، لێ رامانێن ئازاد و کو ژ بۆ ئازادییێ بانگ دکن، ون تو جاری نکارن وان بکوژن. نەرینا ئازاد و رامانێن ئازاد و رەخنەگێر، توجاری دێ نەکەڤن بنێ باندۆرا چاڤسۆر کرنێن و گەفخوارنێن وە، یان بازارییێ ب وە رە دێ نەکن، و تو جاری دێ نەکەڤن بنێ ترس، گەفخوارن و بچووک کرنا وە.
ئەڤ رامانێن سەربخوە و ئازاد و رەخنەگێر، ل کور بن، دێ تم ژ وە رە وەکی “کابووسەکی” بە و ل دوو وە بە و ل سینگا وە بە، و دێ وە دۆرپێچ بکە و وە ئەشکەرە بکە.
ژەهری کرنا جڤاکان، هلبرین و چێرکرنا کۆلەیان ژ ئالییێن رەژیم و هێزێن تۆتالیتەر و چەکپەرەست، هەتا هەتایێ دێ نەمینە.
خوە ڤەشارتنا ل پشت ماسکێن سەختەیێن ب ناڤێن ئازادی، رزگاری و دەمۆکراسییێ، و “کۆمارا دەمۆکراتی، نەتەوەیا دەمۆکراتی و جڤاکا ئەجۆلۆگیک، ئازادییا ژنێ” و هەموو دروشمەیێن خاپینۆ کو دێ هەتا هەتایێ نەمینە.
ئستسمارا خوینا شەهیدان و لیسکا ب هەستێن مالباتێن وان، و ب کار ئانینا ڤان مالباتان ل دژ کەسێن کو په‌كه‌كێ رەخنە دکن، هەتا هەتایێ دێ نەمینە.
ئەگەر ون باوەر یان ژی گومان دکن کو هونێ ژ لێپرسین یاسایی (قانوونی) ل وەلات و دیاسپۆرا، خەلاس ببن و برەڤن، هوون پر شاشن و د خەیالان دە دژین، و ئەڤ یەک هەتا هەتایێ دێ بمینە.
