ب سه‌ده‌ما په‌كه‌كێ بالافرێن تركیێ ب ده‌هان مووشه‌كێن دن ل سه‌ر گوندێن دهۆكێ باراندن

ب سه‌ده‌ما لڤ و ته‌ڤگه‌رێن ب گومان یێن په‌كه‌كێ، بالافرێن شه‌ر یێن ده‌وله‌تا ترك ب ده‌هان بۆمبه‌ و مووشه‌ك ل سه‌ر هه‌ژماره‌كه‌ گوند و هه‌رێمێن دیار یێن پارێزگه‌ها دهۆكێ باراندن.

چاڤكانیێن داركا مازی ئاشكه‌ره‌ كر ژ 26 هه‌یا ئیرۆ 28 ته‌باخێ بالافرێن شه‌ر یێن تركیێ هه‌ژماره‌كا گوندێن دهۆكێ ل ده‌ڤه‌رێن به‌رواری بالا و نهێلیا بۆردومان كرنه‌ و زراره‌ك پر مه‌زن ب خوه‌زا و ئاقارێ وان هه‌رێما دا یه‌.

ده‌ستنیشان كر، سه‌ده‌ما ئێریشێن به‌رده‌وام یێن ده‌وله‌تا ترك ل سه‌ر گوندێن دهۆكێ بۆ لڤ و ته‌ڤگه‌ر ب گۆمان یا چه‌كدارێن په‌كه‌كێ ڤه‌دگه‌ره‌ كو رێخستن دخوازه‌ ئه‌ڤ گوند وه‌رن ڤالا كرن و ببن قادێن شه‌ر.

گوندێن كو ژ 26 ته‌باخێ ڤه‌ هاتنه‌ بۆردومان كرن:

• گوندێ هرورێ.

• چیایێ مەتینا.

• گەلیێ قەسرکێ.

•  گەلیێ سپی.

•  گەلیێ دەرگەلا موسا بەگ.

•  گەلیێ بێشیلێ.

• گەلیێ بازێ.

• تۆنێلا هنداڤی.

• گوندێ گوهەرزێ.

• گەلیێ هەسپا.

ئێریش ووسا بوون:

26\8\2024:

• ‎‏دەمژمێر ‎3:30‏ نیڤرۆ ئارتێشا تركیێ باکورێ گوندێ هرورێ ل دەڤەرا بەرواری بالا تۆپبارانکریە و دو گوللـه‌تۆپ ل چیایێ مەتینا داینە.

• ده‌مژمێر ‎11:10‏ تا ‎11:45‏ سپێدێ هەلیکۆپتەرێن ئارتێشا تركیێ ب چه‌كا دۆشكێ ته‌قه‌ ل گەلیێ قەسرکێ، گەلیێ سپی، گەلیێ دەرگەلا موسا بەگ، گەلیێ بێشیلێ و گەلیێ بازێ ل دەڤەرا بەرواری بالا کریە، هەروەها ‎8‏ مووشەک لێدانە.

• دەمژمێر ‎8:30‏ شەڤێ هەلیکۆپتەرێن ئارتێشا تركیێ توونه‌لا ل هنداڤی گوندێ گوهەرزێ ل دەڤەرا نهێلیا بۆردومانکریە.

27\8\2024:

• دەمژمێر ‎4:45‏ ئێڤاری بالافرێن ئارتێشا تركیێ گەلیێ هەسپا ل  دەڤەرا بەرواری بالا بۆردومانکریە و یه‌ك مووشەک لێدایە.

• ده‌مژمێر ‎5:10 ‏ ئێڤاری ئارتێشا تركیێ باکورێ گوندێ هروورێ تۆپبارانکریە و دو گوللـه‌تۆپ ل چیایێ مەتینا داینە.

• دەمژمێر ‎8:20‏ شەڤێ هەلیکۆپتەرێن ئارتێشا تركیێ توونه‌لا ل هنداڤی گوهەرزێ ‏بۆردومانکریە.

28\8\2024:

• ده‌مژمێر ‎12:30‏ شەڤێ بالافرێن ئارتێشا تركیێ گەلیێ هەسپا ‏ل دەڤەرا بەرواری بالا بۆردومانکریە و یه‌ك مووشەک لێدایە.

• ده‌مژمێر ‎12:48‏ شەڤێ توونه‌لا ل هنداڤی گوهەرز بۆردومانکریە.

ژ گولانا ئیسال 2024ێ ڤه‌ و پاش دژواربوونا ئێریشێن ده‌وله‌تا ترك، رێخستنا په‌كه‌كێ ب ئه‌نقه‌ست چه‌كدارێن خوه‌ دشینه‌ دۆربه‌را گوندێن پارێزگه‌ها دهۆكێ، ئه‌ڤ گوند ده‌وام دكه‌ڤن به‌ر ئێریشان و ڤێ نیگه‌رانیه‌ك مه‌زن ل جه‌م شێنییان چێكریه‌ و په‌كه‌كه‌ ڤێ یه‌كێ ب زانه‌بوون دكه‌ و دخوازه‌ ئه‌و گوند و هه‌رێمێن دهۆكێ وه‌رن ڤالا كرن.