یەشار گولەر ل جۆلەمێرگێ بەردەوامیا ئۆپەراسیۆنێن ل دەرڤەی سینۆرێ ترکیەیێ راگھاند

 وەزیرێ بەرەڤانیێ یێ ترکیەیێ یەشار گولەر ل ناڤەندا فەرماندەھیا فرقەیا 3 یا پەیدایا ل جۆلەمێرگێ، ئۆپەراسیۆنێن لەشکەری یێن ل دژی پەکەکێ گۆتووبێژ کرن و راگھاند، ئۆپەراسیۆنێن وان ل دەرڤەیی سینۆری دێ بەردەوام بن.

وەزارەتا بەرەڤانیێ یا ترکیەیێ گۆت: “بەشەک ژ فەرماندارێن ئارتێشا ترکیەیێ ب رێیا ڤیدیۆیێ بەشداری جڤینێ بوون و پلانا نوویا ئۆپەراسیۆنێن ل ھوندر و دەرڤەیی ترکیەیێ گۆتووبێژ کرن.”

گۆت ژی: “ئارمانجا وان ئەوە کو ھەر مەترسیەک ژ ھەر چاڤکانیێ ڤە نەھێلن، بەریا کو بگھێژە سینۆرێن ترکیەیێ.” ھەروھا دیار کر ژی: “ئۆپەراسیۆنێن وان ل دژی تەرۆرێ یێن ل دەرڤەیی ترکیەیێ دێ بدۆمن.”

ژ ئالیێ خوە ڤە گولەر گۆت: “لگەل بەرفرەھکرنا ئۆپەراسیۆنان، ژێدەرێن تەرۆرێ یێن کو ژ دەرڤە ڤە ل سەر ئەولەھیا ترکیەیێ بوونە مەترسی، دێ ژناڤ ببن.”

ھەروھا گۆت: “کۆریدۆرا تەرۆرێ یا کو دھات خوەستن ل سەر سینۆرێن مە بێ ئاڤاکرن ھات ھلوەشاندن و ئەو رێخستنا تەرۆرێ ل ھوندرێ وەلات گھیشتیە ئاستا تێکبرنێ.”

ئارتێشا ترکیەیێ رۆژا 20 چلەیا 2018 ئۆپەراسیۆنەک ل سەر عەفرینا رۆژئاڤایێ کوردستانێ دابوو دەستپێکرن و د 2019 دە ژی سەرێ کانیێ داگیر کر.

ھەروھا ئارتێشا ترکیەیێ ژ 17 نیسانا 2022 ڤە ل دەڤەرێن زاپ، ئاڤاشین و مەتینایێ یێن باشوورێ کوردستانێ ب ھنجەتا ھەبوونا چەکدارێن پەکەکێ، دەست ب ئێرشەکە ب ناڤێ “ئۆپەراسیۆنا پەنجە-کلیدێ” کریە و ئەو ئێرش ھەتا نھا ژی بەردەوام دکە.