پارتییا وەلاتپارێزێن کوردستانێ (PWK) ئیرۆ 1 ئیلۆنێ د رۆژا ئاشتییێ یا جیھانێ دە پەیامەک بەلاڤ کر و تێ دە راگھاند، “ئەم جارەکە دن بانگی دەولەتا ترکییەیێ دکن: ئەڤ سییاسەتا کو ھوون ل سەر ئەساسێ شەری دمەشینن، ئەڤە 101 سالە چ پرسگرێک چارەسەر نەکرنە و دێ ژ ئیرۆ پێ ڤە ژی چارەسەر نەکە.”
داخویانیا نڤێسینگەها راگەھاندنێ یا PWK وھایە:
بلا 1 ئیلۆنێ ببە دەستپێکا راوەستاندنا شەری، ئۆپەراسیۆنێن لەشکەری و چالاکییێن چەکداری
ئیرۆ 1 ئیلۆنێ رۆژا ئاشتییێ یا جیھانێیە
نەتەوێن یەکبوویی ئەولی رۆژا 1 ئیلۆنێ وەک رۆژا ئاشتییێ یا جیھانێ پیرۆز کر. لێ پاشێ دیسا نەتەوێن یەکبوویی ئەڤ رۆژە گوھەرت و رۆژا 21 ئیلۆنێ وەک رۆژا ئاشتییێ یا جیھانێ قەبوول کر.
لێ مخابن، ئەڤ ھێڤییێن گەلێن جیھانێ یێن ئاشتیخوازییێ بجیھ نەھاتن؛ پشتی بداویھاتنا شەرێ دویەم یێ جیھانێ دیسا شەر و قەتلیعام و جینۆساید بەردەوام بوون.
ل گەلەک وەلاتان ئاگرێ شەری پێکەتن. ل وەلاتێ مە کوردستانێ ژی، مرن، وێرانی، قەتلیعام و جینۆسایدان ھەر بەردەوام کرن.و ئیرۆ ژی وەلاتێ مە ھەر بوویە جیھێ شەر و کوشتنێ.
ئێریش و شەر و سییاسەتا ل دژی کوردان یا دەولەتا ترکییەیێ ئیرۆ ژی ھەر بەردەوامە. مخابن ھینا ژی چ نیشانێن ئاشتییێ و چارەسەرییا سییاسی ل ھۆلێ تونە نە.
ئیرۆ ژی د ناڤ گەلێ ترکییەیێ دە چ ھێزەکە جەماوەری کو دەمۆکراسییێ و ئاشتییێ بپارێزە مخابن تونەیە.
پارێزڤان و ئاکتۆرێ ئەساسی یێ ئاشتییێ و دەمۆکراسییێ بەس گەلێ کوردە و ئەو ژی ب سەرێ خوە مایە.
ئەم جارەکە دن بانگی دەولەتا ترکییەیێ دکن: ئەڤ سییاسەتا کو ھوون ل سەر ئەساسێ شەری دمەشینن، ئەڤە 101 سالن چ پرسگرێک چارەسەر نەکرنە و دێ ژ ئیرۆ پێ ڤە ژی چارەسەر نەکە. سییاسەتا شەری، پرسگرێکان ئالۆزتر و کوورتر دکە.دەست ژ ڤی شەری، دەست ژ ڤێ سییاسەتا کو ل سەر دژایەتییا کوردان ھاتییە ئاڤا کرن بەردن.
چالاکییێن چەکداری یێن پەکەکەیێ ژی، زەرارێ ددە گەلێ کورد، رێ ژ ئێریش و پلان و سییاسەتا دەولەتا ترکییەیێ یا شەری و یا خەتماندنا رێیا چارەسەرییا پرسگرێکان رە خوەشتر دکە. ل باکورێ کوردستانێ پر ب زەلالی ئاشکەرە بوویە کو، شەرتێن شەر و چالاکییێن چەکداری تونەیە و چالاکییێن چەکداری رێیا چارەسەری و ئاموورێن سییاسی، دەمۆکراتیک، سڤیل دگرە، تێکددە. ژبەر ڤێ یەکێ دڤێت بێی کو ل بەندێ بە دەولەتا ترکییەیێ شەری راوەستینە، دڤێت پەکەکە ل باکور و باشوورێ کوردستانێ پێشتر داویێ ل چالاکییێن خوەیێن چەکداری بینە دا کو رێ ژ سییاسەتا شەری و داگیرکەرییا دەولەتا ترکییەیێ رە خوەشتر نەبە.
ئەم بانگی دەولەتا ترکییەیێ دکن دا کو، ھەموو پارتییێن کوردان وەک مخاتەب قەبوول بکە و ژبۆ کو رێیا چارەسەرییا سییاسی یا پرسا کورد و کوردستانێ ب دییالۆگان ڤەبە گاڤان باڤێژە.
ژبۆ کو ئەڤ رۆژا ئاشتییێ یا جیھانێ د چارەسەرییا پرسا کورد و کوردستانێ دە، د بدەستخستنا ئازادی، دەمۆکراسی، ئاشتی و عەدالەتێ دە ببە دەستپێکەک، ئەم بانگی ھەموو ئالییێن پەیوەندیداریێن کوردستانێ و ترکییەیێ دکن دا کو دەنگێن خوە بلند بکن، بھەڤرە گاڤێن ھەڤبەش باڤێژن.
ب مناسەبەتا رۆژا ئاشتییێ یا جیھانێ جارەکا دن ئەم دخوازن بینن بیرا ھەموو دەولەتێن جیھانێ و بیرا گەلێن جیھانێ کو، کلیدەکە ئەساسی یا ئاشتییا رۆژھلاتا ناڤین و یا جیھانێ ژی ئازادییا کوردستانێ و مافێ چارەنووسییا ملەتێ کوردە ل ھەر چار پەرچەیێن کوردستانێ.
