“ئەم ئێریشا نژادپەرەستییا ترکان ل سەر حەکیم لوقمان روورەش دکن”

 پارتیا وەلاتپارێزێن کوردستانێ (PWK)ێ ب داخویانیەکی ئێریشا نژادپەرەستانە یا ژ بەر ئاخافتنا کوردی یا ل ھەمبەر کوردێ ژ باشوورێ کوردستانێ و خەلکێ دھۆکێ یێ ب ناڤێ حەکیم لوقمان شەرمەزار کر.

داخویانیا PWK وەھایە:

نڤێسینگەها راگەھاندنێ یا پارتییا وەلاتپارێزێن کوردستانێ (PWK): کوردەکی ژ  باشوورێ کوردستانێ ل ستەنبۆلێ ژ بەر ئاخافتنا ب کوردی ھاتە قەتل کرن؛ ئەم ڤێ ئێریشا نیژادپەرەستان روورەش دکن

حەکیم لۆقمانێ کو خەلکێ ناڤچەیا شێخانا باژارێ دھۆکێ یا باشوورێ کوردستانێ بوو، شەڤا 31/8/2024 ل گەرەکا ئاکسارایا ستەنبۆلێ، ژ بەر کو ب کوردی دئاخڤی، تووشی ئێریشا 12 کەسێن ھۆڤێن نیژادپەرەستێن ترک بوو و ب کێران ھاتە قەتل کرن.

برا و پسمامەکی حەکیم لۆقمانی ژی د ڤێ ئێریشێ دە بریندار بوونە. پۆلیسان ئەڤ دو کەسێن بریندار دەستەسەر کرنە، لێ پاشێ ھاتنە بەردان.

ژ ئێریشکەران چ کەس ھەتا نھا نەھاتنە گرتن.

روحا حەکیم لۆقمان شاد، جیھێ وی بھەشت بە.

ئەم ژ مالباتا حەکیم لۆقمان رە سەرساخییێ دخوازن.

ئەڤ ئێریشا ھۆڤانە، یا نیژادپەرەستێن ترکان، بەردەوامییا سییاسەت و کریارێن دەولەتا ترکییەیێ نە کو ل سەر دژایەتییا کوردان، ل سەر دژایەتییا زمانێ کوردی تێ مەشاندن.

د ڤان چەند مەھێن داوی دە گەلەک کوردێن کو ب کوردی دئاخڤین روو ب روویی ئێرشێن نیژادپەرەستان بوونە، گەلەک کەس ژ بەر گۆتنا سترانێن کوردی ھاتنە گرتن.

ل گەلەک باژاران والیتییان نڤیسێن شارەدارییان یێن وەکە “پێشی پەیا”، “ھێدی ھێدی” رەش کرن، خەرا کرن.

ئەڤ کریارێن ل دژی زمانێ کوردی ل بەر چاڤێن سەرۆککۆمار رەجەب تەییب ئەردۆگان و رایەدارێن دەولەتا ترکییەیێ ھاتنە کرن. ئەڤە ئەنجاما سییاسەتا دەولەتا ترکییەیێ یە کو ل سەر ئەساسێ دژاتییا کوردان ھاتییە ئاڤا کرن.

ئەم ڤێ ئێرشا نیژادپەرەستێن ترک روورەش دکن. ئەم بانگی رایەدارێن دەولەتا ترکییەیێ دکن دا کو دەملدەست ئێریشکەران تەسبیت بکن و بگرن.

ئەم بانگی سەرۆککۆمار رەجەب تەییب ئەردۆگان و رایەدارێن دەولەتا ترکییەیێ دکن دا کو رێ ل بەر ئێریشێن ل سەر زمانێ کوردی، ئێریشێن ل سەر کوردان بگرن.

دڤێت رایەدارێن دەولەتا ترکییەیێ بزانبن کو ملەتێ کورد ھەتا نھا د ئێریش، قەتلیعام و جنۆسایدان دە ب سەدھەزاران کەچ و لاوێن خوە شەھید دایە. دیرۆکێ ئیسپات کرییە کو تو قەتلیعام و جینۆسایدان نکاریبوویە کو ملەتێ کورد ژ ھۆلێ راکە و نکاریبوویە رێ ل بەر تێکۆشینا دۆزا ئازادییا کوردستانێ بگرە.

ملەتێ کورد سەرێ ھەتا ئیرۆ خوە نەتەواندییێ و دێ نەتەوینە ژی.

ئەم بانگی رێڤەبەرییا حکوومەتا ھەرێما کوردستانێ ژی دکن دا کو ژ بۆ کو  ئەو 12 کەسێن ھۆڤ دەملدەست بێنە گرتن، ب ھەلوەستەکە بریاردار ل گەل رایەدارێن دەولەتا ترکییەیێ پەیوەندییان دەینن.

بژی کورد

بژی کوردستان

1/9/2024

نڤێسینگەها راگەھاندنێ یا پارتییا وەلاتپارێزێن کوردستانێ (PWK)