میلیشیایێن ترکیێ باجێن نوو ل سەر جۆتکارێن عەفرینێ دسەپینن

گرۆپێن چەکدارێن سەر ب ئارتێشا ترکیەیێ ڤە، باجێن نوو ل سەر خەلکێ ھەژمارەک گوندێن ھەرێما عەفرینێ فەرز کرن.

مالپەرا ئەنەکەسێ ل سەر زارێ چەند ژێدەران بەلاڤ کر، چەکدارێن گرۆپا ئەل-ئەمشات ل گوندێ کاخرێ یێ ناڤچەیا مابەتا، باجا 200 دۆلارێن ئامەریکی ل کەسێن کو د خانیێن خزمێن خوەیێن کۆچبەر دە نە فەرز کرن.

ھەروھا ژ بۆ ھەر دارەکە زەیتوونێ 8 دۆلار ل سەر خەلکێ گوندێن کاخرێ و ئانقەلێ، سەنارێ و ھێکچێ یێ ناڤچەیا جندرێسێ فەرز کرن.

ئاماژە ب وێ ژی کر،  چەکدارێن ئەمشاتێ باجا 2500 دۆلار ل سەر خوەدیێن کارگەھێن گڤاشتنا زەیتوونان سەپاندنە.

زێدەتر ژ شەش سالانە ھەرێما عەفرینێ ژ ئالیێ ئارتێشا ترکیێ و گرۆپێن چەکدارێن سەر ب وێ ڤە داگیرکرییە و ھەتا نھا زێدەتر ژ 9 ھەزار کەسان ھاتنە رەڤاندن کو چارەنڤیسا ھەژمارەکا مەزن ژ وان نایێ زانین.

ل گۆر چالاکڤانێن عەفرینێ، گرۆپێن چەکداران ب ئارمانجا کو کوردێن عەفرینێ نەچار ببن دەست ژ جھ و وارێ خوە بەردن و کۆچبەر ببن، وەلاتیان درەڤینن و ئەشکەنجە ددن و پەرە، فدیە و باجان ژ وان دستینن.