سەرۆکاتیا کۆمارا ترکیەیێ رەد دکە کو وەلاتیێ کوردێ خەلکێ کەلەکچیێ ژ بەر نەژادپەرەستیێ ل ستەنبۆلێ هاتبە کوشتن و دبێژە، «لێکۆلین ل سەر وێ روودانێ بەردەوامن».
سێ وەلاتیێن خەلکێ ناحیەیا کەلەکچیێ یا پارێزگەها دهۆکێ ل سەرێ سبەها دوهی (یەکشەم، 01.09.2024) ب چەند کەسان رە ل بەر دەریێ هۆتێلا زووریچێ یا ستەنبۆلێ ب شەر چوون، یەک ژ وان ب ناڤێ حه‌كیم لوقمان ب چەقۆکێ هات کوشتن و یێن دن ژی بریندار بوون.
فەرمانگەها پەیوەندیان یا گرێدایی سەرۆکاتیا کۆمارا ترکیەیێ ئیرۆ (دوشەم، 02.09.2024) د راگەهاندنەکێ دە رەد کر کو حه‌كیم لوقمان ژ بەر نەژادپەرەستیێ هاتبە کوشتن و گۆت، «لێکۆلین ل سەر وێ روودانێ بەردەوامن».
ل دوو وێ راگەهاندنێ، دو کەسان کو وەلاتیێن پارێزگەها باتمانێ یا باکورێ کوردستانێ نە ب حه‌كیم لوقمان و برایێ وی و پسمامێ وی رە شەر کریە و پشتر رەڤینە.
کەسووکارێن حه‌كیم لوقمان راگەهاندبوون، «تەنێ ژ بەر کو حه‌كیم ل خوارنگەهەکە ستەنبۆلێ ب زمانێ کوردی ئاخفتیە، ژ ئالیێ چەند جوانێن ترک ڤە ئێریشی وی هاتیە کرن و ب چەقۆکێ هاتیە کوشتن».
