رێڤەبەریا پارتیا یەکیتیا دەمۆکرات (پەیەدێ) کامپەکا نوو ژ بۆ تەجنیدکرنا زارۆکێن کو ژ ئالیێ رێخستنا چەتەیان یا ب ناڤێ “جەوانێن شۆرەشگەر” یا گرێدایی پارتیا کارکەرێن کوردستانێ (پەکەکێ) ڤە هاتنە رەڤاندن، ل گوندەوارێ باشوورێ حەسەکێ، ئاڤا کریە.
تۆرا سووری یا چاڤدێریا مافێن مرۆڤان راگهاند، “هەسەدێ کامپەکا نوو ل دەڤەرا سەباح ئەل-خێر ل دەردۆرا پارێزگەھا حەسەکێ ئاڤا کریە کو نێزیکی 400 خۆرت و کەچێن تەمەنێ وان د ناڤبەرا 11-13 سالیێ دە، د ڤێ کامپێ دە پەروەردەیا لەشکەری دبینن.
ھەر وھا ئەشکەرە کر، “ئەڤ زارۆکانە نەچارن کو پەروەردەیەکا لەشکەری یا گران دەرباس بکن ژ بۆ ھلگرتنا چەکان، و راستی شووشتنا مەژی تێن.”
تۆرا مافێن مرۆڤان د بەردەوامیا ئاخافتنا خوە دە راگهاند: “ئەڤ کریارە بەرەڤاژی یاسایێن مرۆڤی یێن ناڤنەتەوەیی و پەیمانا مافێن زارۆکان یا سالا 1989 یە، کو دەولەتێن ئالیگر ناچار دکە کو ھەموو تەدبیران وەربگرن دا کو زارۆکێن ژ 18 سالی بچووکتر تەڤلی شەرێ چەکداری نەبن. هەر وەها ئەڤ پێکانین د ھەمان دەمێ دە بنپێکرنا ئەشکەرەیا پرۆتۆکۆلا بژارە یا پەیمانا مافێن زارۆکان یا ل سەر تەڤلێبوونا زارۆکان د شەرێ چەکداری دە یا سالا 2000 یە، کو لەشکەرکرن یان بکارئانینا زارۆکان د شەری دە قەدەغە دکە.”
ڤێ رێخستنێ ھەروەھا گۆت، “راپۆر تەکەز دکن کو ھێزێن سووریا دەمۆکراتیک بەردەوامن ل سەر بنپێکرنا پەیمانا جنێفێ یا چارەمین یا سالا 1949 یا دەربارێ پاراستنا سڤیلان د دەما شەری دە، ژ بەر کو زارۆکان ب دارێ زۆرێ وەکە چەکدارێن بچووک بکار تینن، ب ئاوایەکی کو بەرۆڤاژی پرەنسیبا تایبەت یا پاراستنا زارۆکانە کو زارۆک ل ھەرێمێن پەڤچوونان ژێ سوود وەربگرن.”
تۆرا چاڤدێریا مافێن مرۆڤان یا سووریێ بانگ ل نەتەوەیێن یەکبوویی، ب تایبەتی (یونیسێف و ئۆفیسا کۆمیسەریا بلندا مافێن مرۆڤان) و جڤاکا ناڤدەولەتی ب گشتی کر، کو بلەز ڤان تەدبیران وەربگرن:
– زەختا سیاسی و دیپلۆماتیک ل سەر ھێزێن سووریەیا دەمۆکراتیک بکار بینن ژ بۆ کو داویێ ل لەشکەرکرنا زارۆکان بینە و بێ شەرت و مەرج زارۆکێن رەڤاندی ل مالباتێن وان ڤەگەرینە.
-لێکۆلینێن سەربخوە و ناڤدەولەتی ل سەر ھەموو دۆسیایێن رەڤاندن و لەشکەرکرنا زارۆکان ل باکور و رۆژھلاتێ سووریێ بکن و بەرپرسان ل گۆری پیڤانێن ناڤدەولەتی بدن دادگەھکرن.
– سەپاندنا سزایێن ناڤدەولەتی ل سەر کەس و سازیێن کو ژ ڤان بنپێکرنان بەرپرسیارن، ل گۆری بریارێن ئەنجوومەنا ئەولەکاریێ یێن تێکلداری پاراستنا زارۆکان د شەرێ چەکداری دە، ب تایبەتی بریارێن 1539 و 1612.
– بھێزکرنا بەرنامەیێن تەداویکرنێ ژ بۆ زارۆکێن کو بەرێ ھاتنە لەشکەرکرن، و دابینکرنا پشتەڤانیا دەروونی و جڤاکی ژ بۆی وان، ل گۆری پرەنسیبێن دادوەریا ڤەگوھێز و مافێن زارۆکان.
ل گۆری چاڤدێران ئارمانجا رێخستنا جوانێن شۆرەشگەر ژ رەڤاندنا زارۆکێن تەمەن بچووک، شووشتنا مەژیێ زارۆکان ل گۆر بیردۆزێن پارتیا کارکەرێن کوردستانێ و تەڤلیکرنا وان د ناڤا رەفێن لەشکەری یێن ڤێ پارتیێ دەیە.
