سەرۆکوەزیر مەسروور بارزانی: کوردستان هەردەم نشتیمانێ نەتەوە و ئۆلێن جودا بوویە

سەرۆکێ حكوومەتا هەرێما کوردستانێ دبێژە، «ئەم پابەندی پاراستن و پێشخستنا وێ پێکڤەژیانێنە یا کو سەدەما شانازیا مەیە».

سەرۆکێ حكوومەتا هەرێما کوردستانێ مەسروور بارزانی ئیرۆ (پێنجشەم، 05.09.2024) ل سەر حەسابا خوە یا تۆرا جڤاکی یا X نڤیسی، «ئەم سۆزێ ددن کو وەکی هەر جار گرنگیێ ب زمان و رەوشەنبیریا سریانی و تەڤایا پێکهاتەیێن جودا یێن کوردستانێ بدن».

سەرۆکوەزیر مەسروور بارزانی ئاماژە ژی دا، «کوردستان هەردەم نشتیمانێ نەتەوە و ئۆلێن جودا بوویە، و ئەم پابەندی پاراستن و پێشخستنا وێ پێکڤەژیانێنە یا کو سەدەما شانازیا مەیە».

ب ئامادەبوونا سەرۆکێ حكوومەتا هەرێما کوردستانێ مەسروور بارزانی، ئیرۆ (پێنجشەم، 05.09.2024) «سەمپۆزیۆما یەکێ یا سریانی ل نشتیمانی» ل هەولێرێ ب رێ ڤە چوو.

سەرۆکێ حكوومەتا هەرێما کوردستانێ مەسروور بارزانی د چارچۆڤەیا پێشکێشکرنا گۆتارەکێ دە تەکەز کر، «کوردستان ب درێژاهیا دیرۆکێ وەکی لاندکا مرۆڤاتیێ هەردەم نشتیمانێ نەتەوە و دین و ئۆلێن جودا بوویە. گەلەک شارستانیێن جودا، وەکی شارستانیا سۆمەری، ئەکەدی، دانی، ئاشووری، سریانی و گەلەکێن دن ل سەر ئاخا کوردستانێ سەر هلدایە و پێش کەتنە».

مەسروور بارزانی رۆن ژی کر، «دەما ئێریشی هەرێما کوردستانێ هات کرن، جوداهی د ناڤبەرا ئۆل و چاندێن جودا دە نەهات کرن و هەمی ب یەک چاڤی هاتن تەماشەکرن، ئانکو نەحەز و دژمن وەکی یەک تەماشەیی مە دکن. دڤێ ئەم ژی یەکدەست و وەکی برایان بن، ژ بۆ کو رووبروویی هەمی قەبخوازی و نەخوەشیان ببن».