ب بەلگە – بەهزاد خوسرەوی خوەدی مافێ نشتەجیهبوونا سلێمانیێ بوویە، لێ دیسا ژی یه‌نه‌كێ ئەو رادەستی ئیرانێ کر

پشتی کو ئاساییشا یه‌نه‌كێ ل سلێمانیێ ئەندامەکی پارتیا دەمۆکراتا کوردستانێ – ئیران (پدک-ی) رادەستی ئیستخباراتا ئیتلائاتێ کر، ب داخویانیەکی ئاساییشا یه‌نه‌كێ راگەهاند کو بەهزاد خوسرەوی خوەدی مافێ روونشتڤانیێ ل هەرێما کوردستانێ نەبوویە و ئەندامێ ت ئالیەکی سیاسی یێ رۆژهلاتێ کوردستانێ نەبوویە و ل سەر داخوازا خوە ئەو رادەستی ئیرانێ هاتیە کرن. ڤێ یەکێ ژی چالاکڤانێن سیاسی یێن رۆژهلاتێ کوردستانێ ئاجز کرن و ب وان وێنەیێن ل خوارێ ژی ئیسپات دبە کو بەلگەیێن گرنگن ژ بۆ وان بانگەشەیێن یه‌نه‌كێ وەک دەرەو بێن پشتراست کرن.

بەلگەیێن کو هەنە؛

کارتا نشتەجیهبوونێ ئیسپات دکە کو بەهزاد خوسرەوی خوەدی مافێ نشتەجیهبوونێ بوویە ل سلێمانیێ.

بەلگەیا فەرمی ئانگۆ فۆرما نەتەوێن یەکبوویی ئان ژی ئون ئیسپات دکە کو پەنابەرەکی سیاسی بوویە ل هەرێما کوردستانێ.

ل گۆر دووڤچوونا باسنیۆسێ ل گۆر مادەیا 21 یا دەستوورا ماییندە یا ئیراقێ، نابە پەنابەرێ سیاسی رادەستی وی وەلاتی بێ کرن کو ژێ هاتیە.

ئیرۆ 07.09.2024ێ پدک-ی ب داخویانیەکی فەرمی بانگەشەیێن ئاساییشا یه‌نه‌كێ دەرەواندن و دیار کر، بەهزاد خوسرەوی ئەندامێ پارتیا وان بوویە و 10 سالە ل گەل داییک و خویشکا خوە ل سلێمانیێ نشتەجیهن و مافێ نشتەجیهبوونێ وەک پەنابەرەکی سیاسی ژ وان رە هاتیە دایین.