د هەیاما 4 رۆژێن دەستپێکا مەها ئیلۆنا 2024ان دە، هەری کێم 17 وەلاتیێن کورد کو یەک ژ وان نووجوانەکی 16 سالییە ل باژارێن جودایێن کوردستانێ ژ ئالیێ هێزێن ئەولەهی یێن کۆمارا ئیسلامی یا ئیرانێ ڤە هاتنە بنچاڤکرن و بۆ جهەکی نەخویا هاتنە ڤەگوهاستن.
سازیا مافێ مرۆڤی یا هەنگاوێ ئاشكه‌ره كر، د هەیاما 4 رۆژێن دەستپێکا مەها ئیلۆنا 2024ان دە، 10 وەلاتیێن کورد ل باژارۆکێ بلواناڤایێ سەر ب باژارێ دێوولانێ، 4 وەلاتی کو یەک ژ وان زارۆکەکە ل باژارێ مەهابدێ و 3 وەلاتیێن خەلکێ باژارێ شنۆیێ ژ ئالیێ هێزێن ئەولەهی یێن کۆمارا ئیسلامی یا ئیرانێ ڤە هاتنە بنچاڤکرن و بۆ جهەکی نەخویا هاتنە ڤەگوهاستن.
د رۆژێن یەکشەمی، دوشەمی و سێشەمی دە هەری کێم 10 وەلاتیێن کورد یێن ب ناڤێن جەمیل محەمەدی، شادمان محەمەدی، فوئاد محەمەدی، محەمەد محەمەدی، مێیسەم حاجی مەجید، سەمیر محەمەدی، پێدرام محەمەدی یێ تەمەن 25 سالی و ماردین باقری یێ تەمەن 19 سالی و دو وەلاتیێن دن یێن ب پاشناڤێ باقری کو ناڤێن وان دیار نینە ل باژارۆکێ بلواناڤایێ سەر ب دێوولانێ هاتنە گرتن.
هەروها رامیار ئەبووبەکری یێ 16 سالی و سیاوەش سولتانی ژ ئەندامێن مالباتێن دادخواز، عادل کاکەیێ 23 سالی و ئومید ئەحمەدنژادی یێ تەمەن 35 سالی ژ ئالیێ هێزێن ئەولەهی یێن کۆمارا ئیسلامی یا ئیرانێ ڤە ل باژارێ مەهابادێ هاتنە بنچاڤکرن.
ل بەردەوامیا پێلا بنچاڤکرنا وەلاتیێن کورد د هەیاما چەند رۆژێن بۆری دە، دەمژمێرێن دەستپێکی یێن سبێدەها رۆژا چارشەمی 4ێ ئیلۆنا 2024ان، سێ وەلاتیێن کورد یێن ب ناڤێن دیاکۆ عەزیزییێ تەمەن 34 سالی، لوقمان زەنگی یێ تەمەن 52 سالی دگەل کورێ خوەیێ ب ناڤێ سیامەند زەنگی یێ 22 سالی ل باژارێ شنۆیێ ژ ئالیێ هێزێن ئەولەهی یێن کۆمارا ئیسلامی یا ئیرانێ ڤە هاتنە بنچاڤکرن.
