کابینەیا نەهەمین، ژ بۆ باشترکرنا ژێرخانا هەرێما کوردستانێ و گرێدانا هەموو باژار و باژارۆکان، چەند رێ و پرێن نوو چێکرنە و گەلەک رێ و پرێن دن ژی د وارێ جبجیکرنێ دەنە.
د هەیاما کابینەیا نەهەما حکوومەتا هەرێما کوردستانێ دە، 585 پرۆژەیێن رێیان هاتنە جیبجیکرن کو 75 پرۆژەیێن ستراتەژیک و گرینگن، 291 پرۆژەیێن دن ژی د وارێ جبجیکرنێ دەنە.
ژ وان 585 پرۆژەیێن رێیان کو هاتنە ئەنجامدان، 1363 کیلۆمەترە رێیێن نوو ب بهایێ زێدەتر ژ 930 ملیار دینار هاتنە چێکرن. د ڤان پرۆژەیان دە زێدەتری 11 ملیۆن مەترە چارگۆشە قیر هاتیە بکارانین.
پرانیا پرۆژەیێن رێیان د دەما کابینەیا نەهەما حکوومەتا هەرێما کوردستانێ دە ب دەستێ کارێ ناڤخوەیی هاتنە جیبجیکرن.
چێکرنا رێیان ژ ئالیێ کابینەیا نەهەم ڤە، ب ئارمانجا پێشکێشکرنا خزمەتگوزاریان ژ بۆ وەلاتیان و پێشخستنا سەکتۆرێن بازرگانی، گەشتیاری و پیشەسازییە.
هن ژ پرۆژەیێن رێیان د کابینەیا نەهەم دە
رێیا نوو یا هەولێر – دهۆک
تەڤی قەیرانا دارایی ژی، کابینەیا نەهەم ژ بۆ ئەولەهیا وەلاتیان، ب بهایێ 399 ملیار دینار، بەشەک ژ رێیا نوو یا هەولێر – دهۆکێ دوبارە دروست کر.
پرۆژەیا رێیا هەولێر-دهۆک زێدەتری 86 کیلۆمەتران درێژە و ل هەر ئالیێ رێ ژی فرەهیا وێ زێدەتری 11 مەترەیانیە.
پرا زێیێ مەزن
پرا زێیێ مەزن، مەزنترین پرا هەرێما کوردستانێیە. بەشەک ژ رێیا رۆڤیا – گۆپالە و هەر دو پارێزگەهێن هەولێر و دهۆکێ ب هەڤ ڤە گرێ ددە.
پرا 928 مەترە درێژ و 10 مەترە بلندە. پرا ژ دو ئاراستەیان پێک تێ، فرەهیا هەر ئاراستەیێ 15 مەترەیە و ب بهایێ زێدەتری 43 ملیار دینار هاتیە ئاڤاکرن.
تونەلا پیرمامێ
یەک ژ پرۆژەیێن رێیێن ستراتەژیکێن د کابینەیا نەهەم دە هاتیە تەمامکرن؛ تونەلا پیرمام 2،5 کیلۆمەترە درێژە.تونێلا پیرمام ناڤەندا هەولێرێ ب شەقلاوە و دەشتا هەریرێ ڤە گرێددە.
ئەو تونەل ل سەر ئەرکێ حکوومەتا هەرێما کوردستانێ ب بهایێ 148 ملیۆن دۆلار هاتیە چێکرن. ئەو ب پەرگالەکە پێشکەفتی ڤە هاتی دروستکرن.
پرا دەربەندا رانیایێ
کەڤرێ بنگەهینێ پرا دەربەندا رانیایێ د 13ێ جۆتمەها 2020ان دە ژ ئالیێ سەرۆکوەزیر مەسروور بارزانی ڤە، ب بهایێ 11 ملیار و 387 ملیۆن و 745 هەزار و 800 دینار هات دانین.
پرا 420 مەترە درێژە، 15 مەترە فرەهی و 32 مەترە بلندە. هەروها هەرێما راپەرین، باژارۆکێ دوکانێ و سلێمانیێ ب هەڤ ڤە گرێ ددە و چوونووهاتنا وەلاتیان، بازرگانی، گەشتیاری و چاندنیێ هێسان بکە.
رێیا 150 مەترەیی یا هەولێرێ
رێیا 150 مەترەیی، شەشەمین رێیا بازنەیی یا هەولێرێیە، ئەو رێ ناڤچەیێن بەنسلاوا، کەسنازان، داراتوو، بەحرکێ، گوێر، قوریتان و سەرکارێز ب هەڤ ڤە گرێ ددە.
رێیا 150 مەترەیی یا هەولێرێ یەک ژ مەزنترین پرۆژەیێن کو ژ ئالیێ وەزارەتا شارەداری و گەشتووگوزاریێ ڤە هاتیە جیبجیکرن، درێژیا وێ 70 کیلۆمەترانە و هەر سایدەکە وێ 20 مەترە فرەهە.
تەڤاهیا پرۆژەیێ دێ ب 700 ملیۆن دۆلاران ب داوی ببە، ئەڤ رێ ل دەردۆرا هەولێرێ ب لەز و بێ راوەستان دزڤرە.
چاڤكانی: كوردستان 24
