کۆمەک ژ چەتەیێن “تەڤگەرا جوانێن شۆرەشگەر” یا راستەراست فەرمانا ژ پەکەکێ وەردگرە ئێریشی ئاھەنگەکە پارتیا یەکیتییا خەلاتکرنا خوەندەکارێن سەرکەفتی ل تاخا شێخ مەقسوودا ل حەلەبێ کر و ل رێڤەبەریا ئاھەنگێ و ھەژمارەک خوەندەکار دان.
رێخستنا حەلەبێ یا پارتیا یەکیتیا دەمۆکراتا کورد ل سووریێ (یەکیتی) دوھی د داخویانیەکێ دە بەلاڤ کر، “ئێڤارا 7 ئیلۆنێ، پشتی کو نێزیکی 200 خوەندەکارێن سەرکەفتی لگەل مالباتێن خوە بەشداری مەراسیما خەلاتکرنێ یا ل ھۆلا ستێرکا تاخا شێخ مەقسوود بوون، ب مەبەستا خەلاتکرنا وان ژ ئالیێ رێخستنا مە ڤە، دۆرا 30 ئەندامێن جوانێن شۆرەشگەر ب ئاموورێن تووژ کەتن ھۆلێ، ئێریشی پێشکێشکار و رێڤەبەریا مەراسیمێ و ھندەک ژ بەشداران کرن و ل وان دان، کورسی و مێزە شکاندن، ئالا پارتیێ شەوتاندن و سلۆگانێن ژ بۆ “رێبەر عەبدوللا ئۆجالان” گۆتن.
د داخویانیێ دە ھات گۆتن: “ژ بەر تشتا کو قەومیە، لێدانێن بێسەرووبەر و دەرکرنا بەشدارێن ئاھەنگێ، ھەژمارەک کەس بریندار بوون و لنگێن ھندەکان شکەستن.”
رێخستنا حەلەبێ یا پارتیا یەکیتی گۆت ژی: “ئەم ل حەلەبێ ھەر سال مەراسیمێن سەرکەفتنا خوەندەکارێن سەرکەفتی لدار دخن و خوەندەکار و مالباتێن وان بێ جوداھی ڤەدخوینن، ھەری داوی ژی رۆژا 19 مەھا تەباخا بۆری بوو کو ئەم مۆلەتێ ژی ژ رێڤەبەریا ھێزێن ئەولەکاریا ھوندرین (ئاساییش) وەردگرن.”
پارتیا یەکیتی دبێژە: “ئەڤ کریارا توندووتووژیێ یا ب پلانکری، بەرەڤاژی نرخێن ئەخلاقی، پرەنسیپێن مافێن مرۆڤان، ھەولدانێن بەلاڤکرنا زانست و زانینێ و رێزکنامە و یاسایێن رێڤەبەریا خوەسەرە، ئەم ڤان کریاران شەرمەزار دکن کو زرارێ ددە نێزیکبوونا کوردی-کوردی و ناڤێ رێڤەبەریا خوەسەر.”
ھەروھا د داخویانیێ دە ھات گۆتن: “ئەم بانگ ل رێڤەبەریا تاخا شێخ مەقسوود دکن کو لێکۆلینەکە بێالی بکە و ئێریشکاران بەرپرسیار ببینە، د دەمەکێ دە کو دڤیابوو ئاھەنگا مە بھاتا پاراستن. ھەروھا ئەم رێڤەبەریا تاخێ ژ بەر توندووتووژی و زیانێن مەعنەوی و مادی یێن کو چێبوونە، بەرپرسیار دبینن.”
تاخا شێخ مەقسوودا حەلەبێ، وەک تاخا کوردان تێ ناسین ب ھەزاران کورد و ب تایبەتێن عەفرینێ لێ دژین. ئەو تاخ د دەستێ یەپەگێ/ھەسەدێ دەیە و رێڤەبەریا خوەسەر ژی لێ ھاتیە راگھاندن.
