دوھ، چەکدارێن پارتیا یەکیتیا دەمۆکراتیک “پەیەدێ” چار ئەندامێن رەڤاندی یێن ئەنجوومەنا نشتمانییا کوردی پشتی دەمەکێ ژ بنچاڤکرنا ب زۆرێ کو نێزیکی سێ مەھان دۆم کر، سەربەست بەردان.
کەسێن هاتینە بەردان ئەڤن:
رۆژنامەڤانا ئەنجومەنا نشتیمانییا کوردی ل دەڤەرا عاموودێ بێریڤان ئیسماعیل کو د 9/6/2024 دە ھاتبوو رەڤاندن.
ئەندامێ پارتیا یەکتیا کوردستانێ ژ باژارێ عاموودێ فەواز سالح بەنکۆ کو د 6/9/2024 دە ھاتبوو رەڤاندن.
ئەندامێ پارتیا دەمۆکراتا کوردستان – سووریا عەبدولرەحمان محەمەد شەنک ژ گوندێ گوجەراتێ کو ژ 6/6/2024 ڤە ھاتیە رەڤاندن.
ئەندامێ پارتیا دەمۆکراتا کوردستان – سووریێ خالد میرۆ کو د 6/9/2024 دە ژ باژارێ دێرکێ ھاتبوو رەڤاندن.
د ڤێ دەربارێ دە، بەرپرسێ نڤیسینگەھا پەیوەندیێن گشتی یێن شەپێلا پێشەرۆژا کورد ل سووریێ فادی مەرعی گۆت: دڤێت داوی ل پرسا گرتنا کەسایەتیێن مەدیایی و سیاسەتمەداران ب تاوانێن دەرەو بێ ئانین و ل سەر ئامەریکایێ کو ھەرێم د بن باندۆرا وان دەیە پێویستە ب جددی ل سەر ڤێ خالا بنگەھینا کو ئالیێ دن وەک فاکتۆرەکە فشارێ ب کار تینە بخەبتە، و ئەڤ پێنگاڤ بێ ئەشکەرەکرنا چارەنڤیسا ھەموو کەسێن رەڤاندی و ئازادکرنا وان نە تەمامە، و ل سەر پەیەدێ ژی پێویستە کو داویێ ل دۆسیایا گرتنا کەسایەتیێن سیاسی بینە، کەسێن بنچاڤکری هەموویان سەربەست بەردە و چارەنڤیسا وندایان ئەشکەرە بکە ژ بۆ پێکانینا ئەولەھی و ئارامیێ ل ھەرێمێ.
فادی مەرعی هەر وها گۆت: ئەم بەرێ دەستپێشخەر بوون و هێژان ژی دەستپێشخەرن کو داوی ل کارەساتا نھا وەرە ئانین، ئەو کارەساتا کو گەلێ مەیێ ئازادیخواز و ب روومەت وەستاندیە، لێ د ھەمان دەمێ دە ئەم ل ھەمبەر ھەموو کریار و بنپێکرنێن کو ل دژی مە تێنە کرن وەک ئەنجوومەنا نشتمانییا کوردی رادوەستن و ئەڤ کارە نابن رێگر کو ئەم بەر ب ئارمانجا خوەیا مافدار ڤە بچن.
ھەژمارەک ژ گرتیێن دن یێن ئەنجوومەنێ ھێژ د گرتیگەھێن پارتیا یەکیتیا دەمۆکراتیک دە نە و ئەو ژی ئەڤن:
رۆژنامەگەر راکان ئەحمەد: د 29 ئادارا 2024 دە ل گرکێ لەکێ ژ مالا خوە ھاتیە رەڤاندن.
مەروان حوسێن لیانی: جوانێ چالاک و ئەندامێ دەڤەرا گرکێ لەکێ یا ئەنجوومەنا نشتمانییا کوردی، د 1ێ نیسانا 2024 دە ھاتیە رەڤاندن.
حسسام دۆرسن: ئەندامێ پارتیا گەلا کوردستان-سووریێ کو د 1ێ نیسانا 2024 دە ژ باژارێ دێرکێ ھاتیە رەڤاندن.
رۆژنامەگەر ئەحمەد سۆفی: 2 نیسانا 2024 ژ ھەرێما دێرکێ ھاتیە رەڤاندن.
فەتحی سەرحان کدۆ: ئەندامێ دەستەیا شێورمەندیا پارتیا یەکیتییا کوردستانێ کو د 15ێ خزیرانا 2024 دە ھاتیە رەڤاندن.
