ئه‌لمانیا پشتەڤانیا خوە ژ بۆ هێزا پێشمەرگەیان تەکەز دکە
فەرماندەیا گشتی یا هێزێن ئه‌لمانیایێ ل هەرێما کوردستانێ پشتەڤانیا وەلاتێ خوە ژ بۆ هێزێن پێشمەرگەیان تەکەز دکە، تایبه‌ت ژ بۆ ئامادەکرنا هێزەکە سەربازی کو بکارە رێیێ ل هەر مەترسیەکە نها و پاشەرۆژێ بگرە.
وەزارەتا پێشمەرگە پارڤە کریە، وەزیرێ پێشمەرگە شۆرەش ئیسماعیل ئیرۆ (دوشەم، 09.09.2024) پێشوازیا فەرماندەیێ هێزێن ئه‌لمانیایێ ل هەرێما کوردستانێ کۆلۆنێل لارس پێرسکۆڤێسک، کو ب مەرەما خاترخواستنێ و بداویهاتنا ئەرکێ خوە ل هەرێما کوردستانێ سەردانا وەزیرێ پێشمەرگە کر.
د وێ هەڤدیتنێ دە، وەزیرێ پێشمەرگە ب گرنگی بەحسا رەوشا ئەولەهیا دەڤەرێ و ئیراق و هەرێما کوردستانێ کر، هەروەسا دانوستاندن ل سەر چەند پرسێن گرنگێن وەزارەتا پێشمەرگە و ئاستەنگ و بەربەستێن د رێیا پرۆسەیا چاکسازیێ دە ژی کرن.
وەزیرێ پێشمەرگە سپاسیا گەل و حکوومەتا ئه‌لمانیایێ کر کو هەردەم ب رێیا شێورمەند و دپلۆماتکاران مل ب ملێ هێزێن هەڤپەیمانان پشتەڤانێن هێزێن پێشەرگەیانن، هەروەسا راگەهاند، شێورمەند و یپلۆماتکارێن ئالمان ل هەرێما کوردستانێ رۆلەکە بلند و هەڤاهەنگیەکە زێدە ب مە رە هەبوو، تایبه‌ت د پرۆسەیا چاکسازیێ دە د چارچۆڤەیا هەڤپەیمانیا ناڤدەولەتی دە.
وەزیرێ پێشمەرگە تەکەز ل سەر پێدڤیتیا پلانا پاشەرۆژێ ژ بۆ کارێ هەڤپارێ ناڤبەرا وەزارەتا پێشمەرگە و تیما سەربازی یا ئه‌لمانیایێ ل هەرێما کوردستانێ کر.
کۆلۆنێل لارس پشتی ناساندنا کۆلۆنێل تۆماس رێتەر وەکی جیگرێ خوە، پشتەڤانیا وەلاتێ خوە ژ بۆ هێزا پێشمەرگەیێن کوردستانێ تەکەز کر.
ناڤبری هەروەسا هێڤی کر کو ل پاشەرۆژێ گرنگیەکە زێدەتر ب پەیوەندیێن ناڤبەرا وەلاتێ وی و هێزێن پێشمەرگەیان بێ دان، ژ بۆ کو ب ئالیکاریا ئه‌لمانیایێ و هەڤپەیمانان کارێن جدی بێن کرن، دا کو ممکن بە هێزەکە سەربازی یا ب شیان بێ ئامادەکرن کو ل بەرانبەری هەر مەترسیەکە نها و پاشەرۆژێ رێگر بە.
