ب راگھاندنا دەستپێکا گۆتارا وەزیرێ دەرڤەیێ ترکیەیێ ھاکان فیدان رە، شاندا حکوومەتا سووریەیێ یا ب سەرۆکاتیا وەزیرێ دەرڤە فەیسەل ئەل-مقداد، ژ جڤینا ئەنجوومەنا کۆمکارا عەرەبی یا کو ل قاھیرەیێ برێڤە دچە، ڤەکشیا.
بەشداریا ھاکان فیدان د جڤینێن ئەنجوومەنا کۆمکارا عەرەبی یا لسەر ئاستا وەزیران دە، پشتی 13 سالان ژ برینا پێوەندیێن ترکیەیێ ب ھەژمارەکە وەلاتێن عەرەبی رە تێ.
کانالا “ئەل-حەدەس” یا سعوودی گۆت، شاندا شامێ پشتی راگھاندنا دەستپێکا گۆتارا وەزیرێ دەرڤەیێ ترکیەیێ ھاکان فیدان، ژ ھۆلا جڤینێ دەرکەت و پشتی بداویبوونا ئاخافتنا ھاکان، ڤەگەریا.”
ل گۆری ھن چاڤدێران، ڤەکشینا شاندا شامێ تێ واتەیا نەرازیبوونا شامێ ژ بەشداریا ترکیەیێ د جڤینا کۆمکارا عەرەبی دە، ھەروھا ھەلوەستا وێ یا ل دژی ئاساییکرنا پێوەندیان ب ئەنقەرێ رە نیشان ددە.
د ڤێ دەربارێ دە، وەزیرێ دەرڤەیێ سووریەیێ فەیسەل مقداد ئیرۆ بەری دەستپێکا جڤینێ ژ ئاژانسا “RT” رە تەکەزی ل سەر تەکەزی ل سەر ڤەکشاندنا ھێزێن ترکیەیێ کربوو و گۆتبوو: “ئەگەر ترکیە دخوازە د ھەڤکاریا سووریە-ترکیەیێ دە گاڤێن نوو بێن ئاڤێتن و پێوەندی ئاسایی ببن، دڤێت ژ باکورێ سووریەیێ و رۆژئاڤایێ ئیراقێ یا داگیر کری ڤەکشە.
رێیا ئاساییکرنا پێوەندیێن د ناڤبەرا ترکیە و حکوومەتا سووریەیێ دە، کو مەھا بەرچلەیا 2022 دە ب ناڤبێنکاریا رووسیایێ دەست پێ کربوو و ژ بەر ھەبوونا گەلەک پرسێن ھلاویستی یێن د ناڤبەرا ھەر دو ئالیان دە، ئەو پرۆسە بسەر نەکەت.
شام داخوازا ڤەکشینا ھێزێن ترکیەیێ ژ خاکا خوە دکە، ئەنقەرێ ژی تەکەزیێ ل سەر وێ یەکێ دکە کو ژ بۆ ئاساییکرنا پێوەندیێ، دڤێت مەرجێن پێشوەخت تونە بن.
