چەتەیێن ب ناڤێ “جوانێن شۆرەشگەر” کو راستەراست فەرمانا ژ قەندیلێ وەردگرن، 2 زارۆکێن دن یێن د بن 18 سالیێ دە ب مەبەستا تەڤلیکرنا وان د ناڤا رەفێن چەکدارێن پەکەکێ دە ل رۆژئاڤا کوردستانێ رەڤاندن.
د ڤێ چارچۆڤەیێ دە تۆرا چاڤدێریا مافێن مرۆڤان یا سووریێ داخویانیەک بەلاڤ کر و راگەھاند، چەکدارێن پەکەکێ خۆرتەکی ب ناڤێ خالید مەحموودێ تەمەن 14 سالی ل گوندێ رومانیەیا سەر ب پارێزگەھا رەقا و ھەروەھا خۆرتەکی دن یێ ب ناڤێ ئیبراھیم خەلیل ل باژارێ حەسەکێ رەڤاندنە.
ل گۆر ئاگاهیان خالد مەحموود د 11ێ ئیلۆنا 2024 دە و ئیبراهیم خەلیل ژی د 8ی ئیلۆنا 2024 دە هاتینە رەڤاندن.
تۆرەیێ دا زانین کو تەڤی ھەولدانا مالباتێن زارۆکان و سەرلێدانا ناڤەندێن گرێدایی پارتیا یەکیتیا دەمۆکراتیک و ھێزێن سووریەیا دەمۆکراتیک، ھەتا نھا وان نەکاریە ت ئاگاھیەکێ د دەربارێ چارەنڤیسا کورێن خوە ب دەست بخن.
تێ زانین فەرماندارێ ھێزێن سووریا دەمۆکراتیک مەزلووم کۆبانێ د سالا 2019 دە لگەل ڤێرجینیا گامبا نوونەرا نەتەوێن یەکگرتی بۆ کارووبارێن زارۆکان، ل سەر پەیمانەکێ ئیمزە کربوو، کو ئێدی زارۆکان تەڤلی ھێزێن خوە نەکە و زارۆکێن د ناڤ دە سەربەست بەردە، لێ تا نھا چ پابەندی ب وێ پەیمانێ نەھاتیە کرن، ھەر دەم چەکدارێن ب ناڤ و رەنگێن جودا د ناڤا هەسەدێ دە زارۆکان درەڤینن و تەڤلی لەشکەریا نەچاری دکن.
ل گۆری چاڤدێران ئارمانجا چەتەیێن ب ناڤێ “جوانێن شۆرەشگەر” ژ رەڤاندنا زارۆکێن تەمەن بچووک، شووشتنا مەژیێ زارۆکان ل گۆر بیردۆزیێن پارتیا کارکەرێن کوردستانێ و تەڤلیکرنا وان د ناڤا رەفێن لەشکەری یێن پارتیێ دەیە.
