سەرۆکێ ھەرێما کوردستانێ راگھاند، نابە کامپانیایا ھلبژارتنان ب ئاوایەکی کو ھەڤدو بشکینن و رەش بکن بە و ئاساییشا جڤاکی یا ھەرێما کوردستانێ تێک ببە.
سەرۆکێ ھەرێما کوردستانێ نێچیرڤان بارزانی 15 ئیلۆنێ ل زاخۆیێ ژ رۆژنامەڤانان رە راگھاند، د ھەیاما سێ سالێن بۆری دە، گەلەک کار و پرۆژەیێن جوان ژ بۆ ئیدارەیا سەربخوەیا زاخۆیێ ھاتنە جیبجیکرن.
نێچیرڤان بارزانی گۆت: “تشتێ کو ئەز دخوازم ببێژم ئەوە کو گەلێ مە پێتر پێویستیا وان ب خزمەتگوزاریێ ھەیە. ئەز دەستخوەشیێ ل ھەموو کەسێن کو ژ بۆ ڤێ ئیدارەیێ کارێن باش کرنە، دکم.”
دەربارێ کامپانیایێن بانگەشەیا ھلبژارتنان دە ژی سەرۆکێ ھەرێما کوردستانێ گۆت: “دڤێت بانگەشە بێ کرن، لێ ب ئاوایەکی کو کەس کەسی نەشکینە. د ئەنجامێ دە ئەم ھەموو د ھەمان کەشتیێ دە نە. ھلبژارتن ئاسایییە و دکارە وەرە کرن، لێ دڤێت نەگھێژن ئاستا کو ھەڤدو بشکینن. پێویستە بانگەشەیا ھلبژارتنان ب ئاوایەکی نەیێ مەشاندن کو ئەولەھیا جڤاکی یا ھەرێما کوردستانێ تێک ببە.”
ل سەر پرسگرێکێن لگەل بەغدایێ، نێچیرڤان بارزانی گۆت: “حکوومەتا ھەرێما کوردستانێ ھەول ددە پرسگرێکان د چارچۆڤەیا دەستوورا ئیراقێ دە چارەسەر بکە. ئەم دخوازن ھەموو پرسگرێک د چارچۆڤەیا دەستوورا ئیراقێ دە بێن چارەسەرکرن.”
ئاماژە ب وێ ژی کر: “ئەم ھاتن ڤێ دەڤەرێ ژ بۆ کو ئەم ژ نێزیک ڤە ئاگاھداری رەوشا ڤێ دەڤەرێ بن، تشتێ کو ئەز دبینم ل ڤێ ھەرێمێ کارەکی جوان و باش ھاتیە کرن، ئەز دەستخوەشیێ ل ھەموو وان کەسان دکم کو ژ بۆ زاخۆ کار کرنە.”
