ئەنجوومەنا نشتیمانی یا کورد ل سەر بنپێکرنێن ل عەفرینێ داخویانیەکێ پارڤە دکە و وان بنپێکرنان ب توندی شەرمەزار دکە، ھەروەسا بانگ ل جڤاکا ناڤدەولەتی دکە کو ژ بۆ راوەستاندنا وان تاوانان گڤاشتنان بکە.
ئەنجوومەنا نشتیمانی یا کورد ل سووریەیێ ئەنەکەسە ل سەر بنپێکرنێن ل عەفرینێ ئیرۆ دوشەمبێ، 16/9/2024 راگەھاند، “ژ وێ دەمێ ڤە کو ھەرێما عەفرینێ کەتیە بن کۆنترۆلا گرووپێن چەکدارێن کو ژ ئالیێ ئارتێشا ترکیێ ڤە تێن پشتەڤانیکرن، ھەرێم راستی ھەژمارەکە بنپێکرنێن گران و سیستەماتیک ھاتیە کو وەکە تاوانێن ل دژی مرۆڤاھیێ نە.”
ئەنجوومەنا ناڤبری د بەشەکە دن یا داخویانیا خوە دە گۆت، “ئەڤ ئالی باجێن زێدە ل سەر سڤیلان فەرز دکن؛ ژ بۆ ڤەگەراندنا مال و ئەردان 5 ھەزار دۆلاران و ژ بۆ ھەر دارەکە زەیتوونێ ژی 8 دۆلاران.”
چاڤکانیا ناڤبری رۆن ژی کر، “تەڤگەرا سولتان سلێمان شاھ وەلاتیێ کورد ئیدریس عەبوو و 4 کەسێن دن ژ گوندێ کاخرێ (ئەکی ئاخۆر) رەڤاندن و 11 ھەزار دۆلار فدیە خوەستن، دەما کو نەکارین فدیەیێ بدن، ھاتن ئیشکەنجەکرن و گرتن.”
ھەر وێ چاڤکانیێ ئەشکەرە ژی کر، “دەما کو ژنێن گوند ل بەر بارەگەھا فراکسیۆنێ خوەنیشاندان کرن، ھاتن گولەبارانکرن، ھەروەها گوند ژ ئالیێ لەشکەری ڤە ھات دۆرپێچکرن و ھەموو رێیێن راگھاندنێ ژێ ھاتن قوتکرن و د ئەنجامێ دە گەلەک ژن بریندار بوون.”
ئەنجوومەنا نشتیمانی یا کورد ل سووریەیێ رۆن ژی کر، “ھەرێم ژ تیرمەھا 2024 و ڤر ڤە بوویە شاھدێ گەلەک شەواتان، کو قادێن بەرفرەھێن زەڤیێن چاندنیێ و دارستانان وێران کرنە.”
ئەنجوومەنا نشتمانی یا کوردی ب توندی ئەڤ بنپێکرن شەرمەزار کرن، ھەروەسا بانگ ل جڤاکا ناڤدەولەتی دکە کو ژ بۆ راوەستاندنا ڤان تاوانان گڤاشتنان بکە.”
ئەنجوومەنا ناڤبری تەکەز ژی کر، “دڤێت ھەموو ئالیێن چەکدار ژ دەڤەرێن شێنیان بێن دەرخستن و مەجلیسێن سڤیلێن کو ژ خەلکێ خوەجھی پێک تێن بێن ئاڤاکرن، دا کو خەلک ب روومەت و ئەولەھ ڤەگەرن مالێن خوە.”
