رێخستنا پەکەکێ نە ب تەنێ دژاتیا پارتیێن وەلاتپارێز یێن مینا پەدەکێ دکە بەلکو دژاتیا هەر تشتی دکە کو جڤاکا کورد پێ باوەر بە و دخوازە ڤان باوەران د بەرژەوەندیا خوە دە بگوهەرینە، د نووترین کارێ خوە یێ دوور ژ ئەخلاق دە ئەڤ رێخستن رابوویە ب ریکلامکرنا پرتووکەکێ و وەکە پرتووکەکە پیرۆز کو دکارە جیێ قورئانێ بگرە، بەرچاڤ دکە.
چاپەمەنیا پەکەکێ دەما زێدەتر ژ 3 مەهانە بەرنامەیەکە بەرفرەهـ دانیە ژ بۆی ناساندنا پرتووکەکا ب ناڤێ “نامووس” کو ژ 882 رووپەلان پێک تێ.
پرتووک ژ نڤێسینا “هیوا مەریەم”ە، کو ب ناڤێ “هیوا فریادەرس” تێ ناسکرن، چەندین دانە ژ ڤێ پرتووکێ هاتنە چاپکرن و د پرتووکخانەیێن باژارێ سلێمانیێ ب بهایێ 15 هەزار دینارێن ئیراقی تێ فرۆتن.
پرتووک ب ئاوایەکی گشتگیر هاتیە نڤیساندن، نڤێسەرێ پرتووکێ ل سەر گشت وارێن ژیانێ وەکە “دیرۆک، فەلسەفە، پەروەردە، هشمەندی و رامانێ” نڤیساندیە، و ب ئاوایەکی ئەشکەرە ڤێ پرتووکێ وەکە پرتووکەکە ئاسیمانی ب ناڤ دکە و تەڤ پرتووکێن ئاسیمانی یێن وەکە “قورئان، تەورات و ئینجیل”ێ ب پرتووکێن هەلوەشاندی بناڤ دکە.
لێبەلێ، ژ شێوازێ نڤیساندنا پرتووکێ خویا دبە کو ئەڤ نڤیساندن نە کاری یەک کەس ب تەنێ یە، بەلکو چەندین کەس بەشدار بوونە د نڤێساندنا ڤێ پرتووکێ دە، و ب ئاوایەک گشتی بیر و باوەرێن پەکەکێ د ڤێ پرتووکێ دە هاتنە جی کرن، لۆما نها ژ ئالیێ پەکەکێ ڤە هەول تێ دایین وەکە پرتووکەکە ئاسیمانی ب گەل بدە ناسکرن، پەکەکە ب ئاوایەکی بەردەوام ریکلامێ ژ بۆی ڤێ پرتووکێ دکە و ل سەر پرتووکا “نامووس” دەورەیێن پەروەردەیی ژ کادرۆیێن خوە رە ڤەدکە.
د پرتووکێ دە بانگەشەیا ڤێ یەکێ تێ کرن کو وێ ئەڤ پرتووک ببە سەدەما هلوەشاندنا تەڤ ئاخافتنێن ئۆلێن پێش نها هەیی و کەسێن کو باوەری ب ڤێ پرتووکێ نەیی ب مرۆڤێن هۆڤ و نەزان ددە ناسکرن، هەر وەها ئاخافتنێن د ڤێ پرتووکێ دە وەکە ئاخافتنێن خودایێ مەزن ددە ناسکرن.
ل گۆر ئاگاهیێن دارکا مازی، بۆ دەما 8 سالان چارەنڤیسا هیوا فریادرەس نەدیار بوویە و ئەندامێن مالباتا وی ژی هایداری چارەنڤیسا وی نەبوون، لێ بەلێ پشترە ل ئەورۆپایێ خویا دبە.
پەکەکێ ت نرخەکە ئەخلاقی د جڤاکا کوردی دە نەهشت کو دەست نەئاڤێژێ و نەشرین نەکە، ئۆلا ئیسلامێ کو پرانیا جڤاکا کورد پێ باوەرە مابوو کو ئێریش نەکە سەر، ئەڤ ژی کر، پەکەکێ خوە ژ رێخستنەکە سیاسی ڤەگوهەریە تەریقەتەکە ئۆلی و دخوازە ڤێ یەکێ ب هەر کەسی بدە باوەرکرن.
