مووسا عەنتەر ل دیاربەکرێ ل کوچەیا کو لێ ھاتی کوشتن ب رێرسمەکە بەشداریا سیاسەتمەدار و نڤیسکاران ھات ببیرئانین. د رێرسمێ دە بال ھاتە کێشان کو مووسا عەنتەر هێژان ژی ب پێنووسا خوە رێیا نفشێن نوو رۆنی دکە و ھەر وھا ھات ئاماژەکرن کو ژ بەر کو کوژەر ژ ئالیێ سیستەمێ ڤە ھاتن پاراستن دۆزا کوشتنا مووسا عەنتەر ژی تاریێ دە ما.
32 سال ل سەر کوشتنا نڤیسکار و رۆژنامەگەرێ کورد مووسا عەنتەر دەرباس بوون. مووسا عەنتەر د 20 ئیلۆنا 1992 ل ناڤەندا دیاربەکرێ ل تاخا سەیرانتەپە راستی ئێریشەکە چەکداری ھات و د ئەنجامێ دە د تەمەنێ خوەیێ 72 سالیێ دە ژیانا خوە ژ دەست دا. ب بۆنەیا بیرئانینا مووسا عەنتەر ژی ل کوچەیا کو راستی ئێریشێ ھاتبوو رێورەسمەک ھات ل دار خستن. بەشدارێن رێورەسمێ ئاماژە کرن کو مووسا عەنتەر ژ بۆ کوردان خوەدی جھەک تایبەتە.
رۆژنامەگەر حوسەیین ئاکیۆل: مووسا عەنتەر پێنووسەک خورت و ھێژا بوو، ئەم خوەندەکارێن وی نە، 32 سالن ئەم د رێیا کو وی ڤەکریە دە تەکۆشینێ ددۆمینن، مووسا عەنتەر د رۆژنامەگەریا کوردی دە و د رۆژنامەگەریا ئازاد دە رەمزەکە ھێژا و گرینگە. ئەمێ ھەردەم شۆپینەرێن دۆزا ئاپێ مووسا بن، ئەم ت جاران وی ژ بیر ناکن.”
د رێورەسما بیرئانینێ دە دەربارێ دۆزا کوشتنا مووسا عەنتەر دە ژی ھات ئاماژەکرن کو کوژەرێن مووسا عەنتەر وەکی گەلەک کوژەرێن دنێن کوردان ھاتن پاراستن و ب زانەبوونی دۆز د تاریێ دە ھات ھشتن کو ئەو یەک ژی بەردەوامیا کەڤنەشۆپیا سزانەدانا تاوانێن دژی کوردانە.
د سالا 2006 دە دادگەھا مافێ مرۆڤان یا ئەورۆپایێ گۆت کوشتنا مووسا عەنتەر ب ئاواتەکە تێر و تژە نەھاتیە لێکۆلینکرن و ترکیە ھات سزادان، د 20 ئیلۆنا سالا 2022 دە ژی ژ بەرکو 30 سال ل سەر دەرباس بوون دۆزا کوشتنا مووسا عەنتەر ھات گرتن و د تاریێ دە ما.
