سەرۆکوەزیرێ ھەرێما کوردستانێ مەسروور بارزانی ئیرۆ 21 ئیلۆنێ گۆتارەک د مەراسیما ڤەکرنا کارگەھا سلیڤانایا ژ بۆ بازارکرنا گەنمێ جۆتکاران ل زاخۆیێ دە پێشکێش کر.
سەرۆکوەزیر مەسروور بارزانی ئەو پرۆژە ب “پر گرینگ” ب ناڤ کر و گۆت، ڤەکرنا ڤێ کارگەھێ بەشەک ژ ھەولێن حکوومەتا ھەرێما کوردستانێ ژ بۆ بازارکرنا گەنمێ جۆتکاران ژ ئالیێ سەکتۆرا تایبەت ڤەیە و کارگەھ ل گۆر ستانداردێن ناڤدەولەتی ھاتیە ئاڤاکرن.
ھەروھا ھێڤی خواست کو سەکتۆرا تایبەت د چارچۆڤەیا پلان و بەرنامەیێن حکوومەتا ھەرێما کوردستانێ دە خزمەتا زێدەتر ژ جۆتکارێن زاخۆ و ناڤچەیێن دن رە بکە و کارگەھێن زێدەتر ژ بۆ بازارکرنا گەنمێ جۆتکاران ئاڤا بکە.
سەرۆکوەزیر مەسروور بارزانی دیار کر، کابینەیا نەھەم ھەول دایە گرنگیەکە تایبەت بدە سەکتۆرا چاندنیێ و پیشەسازیا خوارنێ، ژ بەر وێ ژی د چەند سالێن بۆری دە، چ وەکە حکوومەت و چ ب ئالیکاریا سەکتۆرا تایبەت، وان چەند پرۆژەیێن چاندنیێ جیبجی کرنە و ھەژمارەک سایلۆ ژی ڤەکرنە.
ئاماژە ب وێ ژی کر: “مە کار ژ بۆ پەیداکرنا بازارێن ناڤخوە و دەرڤە ژ بەرھەمێن جۆتکارێن حکوومەتا ھەرێما کوردستانێ رە کریە و ئەمێ بەردەوام بن. ئیرۆ بەرھەمێن جۆتکارێن مە دگھە بازارێن وەلاتێن عەرەبی و ئەورۆپایێ، لێ ژ بۆ جۆتکارێن مە گەلەک گرینگە کو ئاستا کوالیتەیا بەرھەمێن خوە بلند بکن و رێبازێن زانستی و مۆدەرن بکار بینن.”
سەرۆکوەزیرێ ھەرێما کوردستانێ گۆت: “یەک ژ مژارێن سەرەکەیێن کابینەیا نەھەم، پڕ رەنگکرنا چاڤکانیێن داھاتێ ل ھەرێما کوردستانێیە. ئیرۆ پێشکەتنا سەکتۆرا چاندنیێ و ئەولەھیا خوارنێ ب ھەزاران دەرفەتێن کار ژ بۆ جوانان پەیدا کرینە.”
ھەروەھا گۆت: “ئارمانجا مە ئەوە کو ئەم جڤاکا خوە ژ بکارھێنەر بۆ بەرهەمهێنەر ڤەگوھەرینن، ژ بەر وێ ژی ئەمێ ب ھەر ئاوایی پشتەڤانیا بەرهەمئانینا ناڤخوە بکن، دا کو کارگەھ و پرۆژەیێن وھا بەردەوام بن و ئەم کاربن لگەل بەرھەمێن بیانی ھەڤرکیێ بکن.”
