پارتیا وەلاتپارێزێن کوردستانێ راگهاند کو دەولەتا ترکیەیێ بێتەحه‌مولیا خوە یا ل دژی زمانێ کوردی بەردەوام دکە.
ل سەر زارۆکستانا کو ل ئامەدێ هاتبوو ڤەکرن لێپرسینێ دەست پێ کر.
شارەداریا باژارێ مەزن یا ئامەدێ ژ بۆ پەروەردەیا زارۆکان کرەشا ب کوردی یا ب ناڤێ «زارۆکستان»ێ ڤەکربوو.
وەزارەتا کارێن ناڤخوە یا ترکیەیێ ل سەر زارۆکستانێ لێپرسین دا دەستپێکرن.
د چارچۆڤەیا لێپرسینێ دە 2 مفەتشێن ملکیەیێ هاتن ئەرکدارکرن.
هەر وها ل ناڤچەیا فارقینێ یا ئامەدا دەستوور نەهات دایین کو ناڤێ ب کوردی ل قادا باژێر وەرە کرن.
مەجلسا شارەداریا فارقینێ بریار دابوو کو ناڤێ قادا باژارا کلچاسلانێ یەکەمین بکە رندێخان.
لێ قایمەقامیا فارقینێ گۆتیە «رندێخان»نە ب ترکییە و ئەڤ ناڤ رەد کریە.
«ئەم پشتگریا شارەداریا ئامەدێ دکن»
پارتیا وه‌لاتپارێزێن كوردستانێ ب داخویانیەکێ نەرازیبوون ل هەمبەری ڤان بریارێن ل دژی کوردی نیشان دا و گۆت:
«ئەم ژ بەر بریارێن وان یێن ژ بۆ زمانێ کوردی، ژ بۆ دبستانا زارۆکان یا ب کوردی، پشتگریا شارەداریا باژارێ مەزنا ئامەدێ و مەجلیسا شارەداریا فارقینێ دکن.
دڤێ هەموو خەبات و پرۆسەدورێن شارەداریان، ل گۆری پێکهاتەیێن وی باژاری و وێ ناڤچەیێ ب پرزمانی بێنە مەشاندن».
«دەولەتا ترکیەیێ بێتەحه‌مولیا خوە بەردەوام دکە»
پارتیا وه‌لاتپارێزێن كوردستانێ هەر وها گرتینێن ژ بەر گۆڤەن و سترانێن کوردی ژی ب بیر خست و گۆت:
«بەلێ، ژ ئالیەکی ڤە کەسێن کو د داوەتان دە ب کوردی سترانان دبێژن تێنە دەستەسەرکرن، هنەک کەس ژ بەر کو ب کوردی ئاخڤینە راستی ئێرشان دبن و تێن کوشتن.
ژ ئالیەکی ڤە ژی رایەدارێن دەولەتا ترکیەیێ بێتەحه‌مولیا خوە یا ل دژی زمانێ کوردی بەردەوام دکن.
ئەم بانگی رایەدارێن دەولەتا ترکیەیێ دکن، د دەمەکێ دە کو ته‌ره‌ته-کوردی، بەشێن زمان و ئەدەبیاتا کوردی، دەرسا بژارتە یا کوردی هەنە، دەڤ ژ ڤێ سیاسەت و هەلوەستێن خوەیێن ل دژی زمانێ کوردی بەردن.
رێ ل بەر ئێرشێن ل سەر کەسێن کو ب کوردی داخڤن بگرن و ئێرشکاران جەزا بکن».
«دڤێ ئەم زێدەتر ل کوردی خوەدی دەرکەڤن»
پوکیێ هەر وها بانگی شارەداریێن باکورێ کوردستانێ کر و گۆت:
«ل گەل زمانێ ترکی، زمانێ کوردی (کورمانجی و کرمانجکی/زازاکی) وەکی زمانێ شارەداریێ ب کار بینن و ناڤێن کوردی یێن باژار، ناڤچە و هەرێمان ل گەل زمانێ ترکی ب کار بینن، دبستان و کرەشێن ب زمانێ کوردی ل هەر شارەداریێ ڤەکن.
ئەم بانگی هەموو کوردان ژی دکن د دەمەکێ دە کو ئێرشێن پرئالی ل سەر زمانێ کوردی تێن مەشاندن، دڤێ د هەر بەشێن ژیانێ دە، ئەم زێدەتر ل کوردی خوەدی دەرکەڤن، کوردی باخڤن، کوردی فێر ببن.
زمانێ مە هەبوونا مەیە».
