رێخستنا چەتەیان یا ب ناڤێ “جوانێن شۆرەشگەر”یا سەر ب پارتیا کارکەرێن کوردستانێ (پەکەکێ)ڤە، ب ئارمانجا تەڤلیکرنا ناڤ رەفێن پارتیێ، زارۆکەک ژ باژارێ حەلەبێ رەڤاند.
ل گۆر ئاگاهیێن د سۆسیال مەدیایێ دە ژ ئالیێ چالاکڤانێن رۆژئاڤا کوردستانێ هاتین پارڤە کرن، د 2/9/2024 دە ئەندامێن رێخستنا “جوانێن شۆرەشگەر” زارۆکێ ب ناڤێ محەمەد قۆشۆ ژ تاخا شێخمەقسوودا حەلەبێ رەڤاندیە کو ئەو د کارگەهەکا درووتنێ دە دشۆغلی.
محەمەد رەشید قۆشۆ کو دایکا وی حەمیدە حەسەنە، د 1ێ چلەیا 2010 دە ل باژارۆکێ راجۆ یێ گرێدایی عەفرینێ ژ دایک بوویە.
تێ زانین فەرماندارێ ھێزێن سووریا دەمۆکراتیک مەزلووم کۆبانێ د سالا 2019 دە لگەل ڤێرجینیا گامبا نوونەرا نەتەوێن یەکگرتی بۆ کارووبارێن زارۆکان، ل سەر پەیمانەکێ ئیمزە کربوو، کو ئێدی زارۆکان تەڤلی ھێزێن خوە نەکە و زارۆکێن د ناڤ دە سەربەست بەردە، لێ تا نھا چ پابەندی ب وێ پەیمانێ نەھاتیە کرن، ھەر دەم چەکدارێن ب ناڤ و رەنگێن جودا د ناڤا هەسەدێ دە زارۆکان درەڤینن و تەڤلی لەشکەریا نەچاری دکن.
ل گۆری چاڤدێران ئارمانجا چەتەیێن ب ناڤێ “جوانێن شۆرەشگەر” ژ رەڤاندنا زارۆکێن تەمەن بچووک، شووشتنا مەژیێ زارۆکان ل گۆر بیردۆزیێن پارتیا کارکەرێن کوردستانێ و تەڤلیکرنا وان د ناڤا رەفێن لەشکەری یێن پارتیێ دەیە.
