سەرۆکێ حكوومه‌تا هەرێما کوردستانێ داخوازێ ژ ئالیێن سیاسییێن هەرێما کوردستانێ دکە کو، «بانگەشەیەکە ئارام و شارستانی» ژ بۆ هلبژارتنێن پەرلەمانا کوردستانێ دەست پێ بکن.
سەرۆکێ حكوومه‌تا هەرێما کوردستانێ مەسروور بارزانی ئیرۆ (چارشەم، 25.09.2024) ده‌مژمێر 08:00ێ سەرێ سبەهێ ل دبستانا نەجیبەخان یا جەلی زادە یا کۆیەیێ، د مەراسیمەکێ دە ب ئامادەبوونا وەزیرێ پەروەردەیێ ئالان حەمە سەعید، پارێزگەرێ هەولێرێ ئومێد خۆشناو و بەرپرسێن دەڤەرێ زەنگا سالا نوو یا خواندنێ (2024-2025) لێ دا و گۆتارەک پێشکێش کر.
سەرۆکوەزیرێ هەرێما کوردستانێ د گۆتارا خوە دە بەحسا دەستپێکرنا هلبژارتنێن پەرلەمانا کوردستانێ کر، کو ب بریارا کۆمسیۆنا بلندا سەربخوە یا هلبژارتنان یا ئیراقێ ئیرۆ (چارشەم، 25.09.2024) بانگەشەیا هلبژارتنێن گەرا شەشێ یا پەرلەمانا کوردستانێ دەست پێ دکە و هەتا رۆژا 15.10.2024ێ بەردەوام دبە.
سەرۆکوەزیر مەسروور بارزانی رۆژا دەستپێکێ یا بانگەشەیا هلبژارتنێن پەرلەمانا کوردستانێ وەکی رۆژەکە دیرۆکی ژ بۆ هەمی خەلکێ هەرێما کوردستانێ بناڤ کر و داخواز ژ ئالیێن سیاسی کر کو، «بانگەشەیەکە ئارام و شارستانی دەست پێ بکن و هەمی ئالی وێ یەکێ ل بەر چاڤ وەبگرن، کو بەرژوەندیا بلندا وەلاتێ مە د سەر هەمی بەرژەوەندیان رە بە».
هلبژارتنێن گەرا شەشێ یا پەرلەمانا کوردستانێ ل رۆژا 20.10.2024ێ ب سەرپەرشتیا کۆمسیۆنا بلندا سەربخوە یا هلبژارتنانا ئیراقێ تێن کرن.
سەرۆکێ حكوومه‌تا هەرێما کوردستانێ تەکەز ژی کر، «دڤێ سەرکەفتنا هلبژارتنان و دەستنیشانکرنا نوونەران ژ بۆ وێ یەکێ بن کو زێدەتر خزمەتا گەل و وەلاتێ مە بکن و هەمی مافێن خەلکێ مە ب ئانەها خودێ بدەست بخن».
سەرۆکوەزیر مەسروور بارزانی پشتی کو زەنگا سالا نوو یا خواندنێ لێ دا چوو ناڤ هەژمارەکە پۆلێن خوەندەکارێن دبستانا نەجیبەخانا جەلی زادە، داخوازا سەرکەفتنێ ژ خوەندەکاران رە کر و ژ وان رە بەحسا دیرۆکا هلبژارتنێن پەرلەمانا هەرێما کوردستانێ کر.
مەسروور بارزانی ژ خوەندەکاران رە گۆت، «جەنابێ سەرۆک بارزانی جارا یەکێ ل باژارێ کۆیەیێ، ل ئیدارەیا سەربخوە یا راپەرینێ، بریارا کرنا هلبژارتنێن پەرلەمانا کوردستانێ دا و گۆت: دڤێ هلبژارتن بێن کرن، پەرلەمان بێ دامەزراندن و سیستەما دەستهلاتداریێ ببە دەمۆکراسی».
سەرۆکوەزیرێ هەرێما کوردستانێ هێڤی ژی خواست کو هەمی خوەندەکارێن هەرێما کوردستانێ ل بەر سیبەرا ڤێ دەستهلاتداریێ، وەلات و کیانی ب ناهەدا خودێ ببن کەسێن گەلەک مەزن، شارەزا و زیرەک.
