رێخستنا ب ناڤێ “جوانێن شۆرەشگەر” یا سەر ب پارتیا کارکەرێن کوردستانێ “پەکەکێ”ڤە، زارۆکەکی تەمەن بچووک ژ تاخا شێخ مەقسوودا حەلەبێ ب ئارمانجا تەڤلیکرنا ناڤا رەفێن پارتیێ درەڤینن.
تۆرا چاڤدێریا مافێن مرۆڤان یا سووریەیێ ئەشکەرە کر، جوانێن شۆرەشگەر د 15 ئیلۆنێ دە زارۆکێ 14 سالی یێ ب ناڤێ “شوعەیب ئەحمەد سالح” ژ تاخا شیخ مەقسوودا حەلەبێ رەڤاندیە.
تۆرەیێ هەر وەها ئەشکەرە کر، تەڤی هەولێن مالباتا ڤی زارۆکی ژ بۆی لێکۆلینکرنا چارەنڤیسا وی و سەرەدانا ناڤەندێن گرێدایی پارتیا یەکیتیا دەمۆکراتیک و هێزێن سووریەیا دەمۆکراتیک، لێ هەتا نها نەکارینە ت ئاگاهیان د دەربارێ چارەنڤیسا کورێ خوە ب دەست بخن.
تێ زانین فەرماندارێ ھێزێن سووریا دەمۆکراتیک مەزلووم کۆبانێ د سالا 2019 دە لگەل ڤێرجینیا گامبا نوونەرا نەتەوێن یەکگرتی بۆ کارووبارێن زارۆکان، ل سەر پەیمانەکێ ئیمزە کربوو، کو ئێدی زارۆکان تەڤلی ھێزێن خوە نەکە و زارۆکێن د ناڤ دە سەربەست بەردە، لێ تا نھا چ پابەندی ب وێ پەیمانێ نەھاتیە کرن، ھەر دەم چەکدارێن ب ناڤ و رەنگێن جودا د ناڤا هەسەدێ دە زارۆکان درەڤینن و تەڤلی لەشکەریا نەچاری دکن.
ل گۆری چاڤدێران ئارمانجا چەتەیێن ب ناڤێ “جوانێن شۆرەشگەر” ژ رەڤاندنا زارۆکێن تەمەن بچووک، شووشتنا مەژیێ زارۆکان ل گۆر بیردۆزیێن پارتیا کارکەرێن کوردستانێ و تەڤلیکرنا وان د ناڤا رەفێن لەشکەری یێن پارتیێ دەیە.
