پارتیا وەلاتپارێزێن کوردستانێ (PWK) ب بۆنەیا سالڤەگەرا رەفەراندووما سەرخوەبوونا کوردستانێ داخویانیەک بەلاڤ کر.
داخویانیا پارتیا وەلاتپارێزێن کوردستانێ واھایە:
د رۆژا 25 ئیلۆنا 2017 دە، ل باژارێن کو ب رێڤەبەرییا ھەرێما کوردستانێ ڤە گرێدایی نە (ھەولێر، سلێمانییە، دوھۆک و حەلەبچە) و ل نەڤچەیێن دن یێن باشوورێ کوردستانێ، یێن کو مژارا مادەیا 140 نە، رەفەراندووما سەرخوەبوونێ ب ئاوایەکی مەشرووع و دەمۆکراتیک ھاتە لدارخستن.
گەلێ باشوورێ کوردستانێ، سەرەرایی ھەموو تەھگەف، فشار، ئاستەنگی، ئێریش و پلانێن قرێژ یێن دەرڤە و ناڤخوەیی ژی ب جەسارەت، ب بریارداری و ب خوە باوەرییەکا ب روومەت چوون سەر سندۆقان و %92.73 ژ بۆی سەرخوەبوونێ گۆتن “ئەرێ”. ئەڤ ھەلوەستا گەلێ مە، ب رێیێن دەمۆکراتیک راگەهاندنا ئیرادەیەکا مەشرووع یا نەتەوەیی بوو.
د ھەفتەمین سالڤەگەرا رەفەراندووما سەرخوەبوونێ دە، ئەم ھەم رەفەراندوومێ و ھەم ژی ئەنجامێن وێ ب رێزداری سلاڤ دکن و جارەکە دن رادگەهینین کو ئەم پشتگرییێ ل ڤێ ئیرادەیا گەلێ خوە یا رەوا و دیرۆکی دکن.
دەولەتا فەدەرەیا باشوورێ کوردستانێ، بەرھەما کەد، خەبات و تێکۆشینا ھەموو شەھید و خەباتکارێن ھەر چار پەرچەیێن کوردستانێیە؛ نموونە و نیشانا ئیرادەیا خوەیدارەکرنا گەلێ کوردستانێیە. ئەم دبێژن لێخوەدیدەرکەتنا ئیرادەیا رەفەراندووما سەرخوەبوونێ و پاراستنا دەستکەفتییێن باشوورێ کوردستانێ ئەرکەکی نەتەوەیی، نشتمانی یا ھەموو کوردێن ھەر چار پەرچەیێن کوردستانێ و جیھانێیە.
ئەشکەرەیە کو ھەر ئێریش، دژمناتی و ھەلوەستەکە عەسکەری، سییاسی و راگەھاندنی یا ل دژی دەستھلاتداری و دەستکەفتنێن ھەرێما فەدەرەیا باشوورێ کوردستانێ نە د بەرژەوەندییێن گەلێ مە دەیە، ئەڤ ژ پلانێن خەرابێن خێرنەخوازێن گەلێ کوردستانێ رە رێ خوەشتر دکە.
ئەم بانگی ھەموو ھێزێن چەکداری و سییاسی؛ ھەموو دەولەتێن جیھانێ و یێن ھەرێمی دکن کو رێزێ ل دەستھلاتداری و سەلاحییەتا مەشرووع یا سەرۆکاتی، حکوومەت، پارلامەنتۆ و ھێزێن پێشمەرگەیێن باشوورێ کوردستانێ و ل بریارێن وان بگرن.
ھێڤی و داخوازا مە ژ پارتییێن سییاسی و ژ سەرۆکاتی، حکوومەت و پارلامەنتۆیا باشوورێ کوردستانێ ئەوە کو ل ئیرادەیا رەفەراندووما 25 ئیلۆنا 2017 خوەدی دەرکەڤن و ب تفاق و یەکگرتنەکە نەتەوەیی، نشتمانی ل ھەموو دەستکەفتییێن ھەیی یێن ل باشوورێ کوردستانێ خوەدی دەرکەڤن؛ ھێزا پێشمەرگە و ھەموو دەزگەھێن ھەیی یێن دەولەتبوونێ بکن یەک، پێشدە ببن و دەزگەھێن نوو یێن پێویست ئاڤا بکن.
25/9/2024
نڤێسینگەها راگەھاندنێ یا پارتییا وەلاتپارێزێن کوردستانێ (PWK)
