جیبجیکرنا ماستەرپلانا باژارێ حەلەبجە ژ بۆ کۆمپانیایەکە بیانی یا ناسکری ھات دایین و پارێزگارێ حەلەبچە ژی دبێژە، ئەو ماستەرپلان بەرھەما سەردانا سەرۆکوەزیر مەسروور بارزانی بۆ وی باژاری بوو.
ب ئامادەبوونا وەزیرێ شارەداری و گەشتووگوزارێ ساسان عەونی و پارێزگارێ حەلەبچەیێ ئازاد تۆفیق، وەزارەتا شارەداری و گەشتووگوزارێ گرێبەستەک ل گەل کۆمپانیەکە بیانی یا ناسکری بۆ جیبجیکرنا ماستەرپلانا حەلەبچەیێ ئیمزە کر.
وەزیرێ شارەداری و گەشتووگوزارێ د کۆنفەرانسەکە رۆژنامەڤانی دە راگھاند، ماستەرپلان ب خەرجکرنا زێدەتری ملیار دیناران ل سەر بوودجەیا حکوومەتا ھەرێما کوردستانێ، دێ د ھەیاما 450 رۆژان دە وەرە جیبجیکرن.
ساسان عەونی گۆت، ھەڤاھەنگی و ھێسانکاری د ناڤبەرا ئۆفیسێن وەزارەتا شارەداری و گەشتووگوزاری و پارێزگەھا حەلەبچە دە دێ بێ کرن، ژ بۆ جیبجیکرنا ماستەرپلانێ ب باشترین شێوە.
ل گۆری وەزیرێ شارەداری و گەشتووگوزاری، کۆمپانیا کو دێ ماستەرپلانا حەلەبچەیێ جیبجی بکە، کۆمپانیەک پر پێشکەتییە ل رۆژھلاتا ناڤین و بەریا نھا ژی چەند ماستەرپلان ل ھەرێما کوردستانێ جیبجی کربوون، ژ وان ژی، کەمبەرا کەسکا ھەولێرێ، لگەل چەند پرۆژەیێن دنێن مەزن.
پارێزگارێ حەلەبچەیێ: ماستەرپلان بەرھەما سەردانا سەرۆکوەزیرە
پارێزگارێ حەلەبچە ئازاد تۆفیق ژ بۆ جیبجیکرنا ماستەرپلانا حەلەبچە سپاسیا سەرۆکوەزیر مەسروور بارزانی کر.
ئازاد تۆفیق گۆت، دانینا ماستەرپلانێ و جیبجیکرنا وێ، ژ ئەنجاما سەردانا سەرۆکوەزیر مەسروور بارزانی بۆ حەلەبچەیێ بوو. ھەروھا ھێڤی خواست ژی کو جیبجیکرنا ڤێ پرۆژەیێ، ببە گاڤەکە نوو ژ بۆ ئاڤەدانکرنا باژێر.
بریارا سەرۆکوەزیر ژ بۆ جبجیکرنا ماستەرپلانێ
سەرۆکوەزیر مەسروور بارزانی رۆژا 28/3/2024، فەرمانا تەرخانکرنا پەرەیێن پێویست ژ بۆ پرۆژەیا ماستەرپلانا حەلەبچە دا.
جیبجیکرنا ماستەرپلانا حەلەبچەیێ دێ ببە سەدەما ڤەژین و گەشەپێدانا حەلەبچەیێ د ھەموو ئالیان دە و دێ ببە بنگەھا ژێرخانا باژێر. ئەڤ پرۆژە، پرۆژەیەک بەرفەرەھە و ھەموو بەشێن گرینگێن باژێر ل خوە دگرە و د پێشەرۆژێ دە حەلەبچە دێ قۆناغەکە نوو و پێشکەتی ببینە.
