حزبوللاھا لبنانی دوھ 28 ئیلۆنێ کوشتنا سەکرەتەرێ گشتی یێ پارتیێ حەسەن نەسروللاھ د ئێریشێن ئیسرایلێ ل سەر تاخا باشوورا بەیرووتێ دە راگھاند، ڤێ یەکێ کارڤەدانێن جودا ل پەی خوە ئانین.
پشتی ئەشکەرەبوونا کوشتنا حەسەن نەسروللاھ، پرانیا ئالی و کەسێن نێزی میحوەرێ مقاوەمێ یێ کو ئیران سەرکێشیا وێ دکە نیگەرانیا خوە راگهاند و ئەڤ ئێریشا ئیسرائیلێ ب توندی شەرمەزار کرن، د ناڤ دە هن هێز و کەسایەتێن کوردی ژی هەبوون.
یەک ژ ئالیێن کوردی یێن هەری زێدە ب کوشتنا حەسەن نەسروللاھ ب باندۆر بووی یەنەکە بوو، ژ بەر کو یەنەکە ژی ب پارتیەکە سەر ب بەرەی مقاوەمێ یێ شیعەیان تێ ناسکرن، لێ بەلێ یەنەکێ ژ بەر ترسا ژ کارڤەدانێن هەرێمی و ناڤخوەیی د ڤێ دەربارێ دە ب ئاوایەکی راستە راست هەڤخەمی و نیگەرانیا خوە ئەشکەرە نەکر، بەلکو هن ژ بەرپرسێن ڤێ پارتیێ ب ئاوایەکی کەسۆکی هەڤخەمیا خوە دیار کرن.
باندۆرا هەری زێدە یا کوشتنا حەسەن نەسروللاھ ل سەر ئالی و کەسایەتێن نێزی ئیرانێ ل شەنگالێ خوەیا بوو، شێخ داوۆد جندی بەرپرسێ مەلبەندا یەنەکێ یا ل شنگالێ ل سەر حەسابا خوە یا فەیسبۆکێ ب پارڤەکرنا وێنەیەکی حەسەن نەسروللاھ هەڤخەمیا خوە ژ بۆی کوشتنا وی ئەشکەرە کر، تازی و شینی دانی، ئەڤ ژی ئیسپات دکە کو ب کوشتنا حەسەن نەسروللاھ ئالی و کەسایەتێن سەر ب بەرەی مقاوەمێ کەتنە رەوشەکە دەروونی یا پڕ خەراب، ژ بەر کو یەک ژ مەزنترین بەرپرسێن وان هاتیە کوشتن.
وەکە دخویە کوشتنا کەسایەتێن مینا حەسەن نەسروللاھ وێ بەردەوام بکە، لێ بەلێ کا دێ هەیا کەنگێ بەرپرس و ئالیێن کوردی یێن سەر ب ئیرانێ ژ خیانەتا خوە یا ل همبەر کورد و کوردستانێ پاشگەز ببن هەیانی نها نەخویایە، ئەڤ ژی کوردان دخە رەوشەکە ئالۆز و نەدیار.
