رێخستنا چەتە یا ب ناڤێ “جوانێن شۆرەشگەر” کو راستەراست فەرمانا ژ قەندیلێ وەردگرە، زارۆکەکی تەمەن بچووک ژ باژارێ کۆبانیێ ب مەبەستا چەکدارکرنا وی د ناڤا رەفێن پارتیێ دە رەڤاند.
چاڤکانیێن پێگەها دارک مازی ل رۆژئاڤا کوردستانێ ئەشکەرە کرن، چەتەیێن ب ناڤێ “جوانێن شۆرەشگەر” د رۆژا 10/9/2024 دە ل گوندێ بیر محلێ یێ سەر ب باژارۆکێ کۆبانیێ زارۆکەکی 12 سالی یێ ب ناڤێ نەسرەدین سالح شێخی کو ژ شێنیێن گوندێ بیر تحلێ یێ باشوورێ کۆبانیێ یە رەڤاند.
چاڤکانیێن دارکا مازی دان زانین، د دەما رەڤاندنا ڤی زارۆکی دە، باڤێ وی زارۆکی ژ بۆی ئازادکرنا کورێ خوە ژ دەستێ ڤان چەتەیان دەست ئاڤێتیە چەک و تەقە ل ڤان چەتەیان کریە، ژ بەر ڤێ سەدەمێ یەک ژ ئەندامێن ڤێ گرووپا چەتە یێ ب ناڤێ “خالد عیسا مسلم” کو کادرۆیێ پەکەکێ یە و ژ شێنیێن گوندێ بلێ یێ سەر ب کۆبانیێ یە بریندار بوویە، پشترە باڤێ نەسرەدین ژ ئالیێ ئاساییشا پەیەدێ ڤە هاتیە دەستەسەرکرن و کورێ وی ژی ژ ئالیێ چەتەیێن “جوانێن شۆرەشگەر” ڤە بەر ب جیەکی نەدیار ڤە هاتیە رەڤاندن.
تێ زانین فەرماندارێ ھێزێن سووریا دەمۆکراتیک مەزلووم کۆبانێ د سالا 2019 دە لگەل ڤێرجینیا گامبا نوونەرا نەتەوێن یەکگرتی بۆ کارووبارێن زارۆکان، ل سەر پەیمانەکێ ئیمزە کربوو، کو ئێدی زارۆکان تەڤلی ھێزێن خوە نەکە و زارۆکێن د ناڤ دە سەربەست بەردە، لێ تا نھا چ پابەندی ب وێ پەیمانێ نەھاتیە کرن، ھەر دەم چەکدارێن ب ناڤ و رەنگێن جودا د ناڤا هەسەدێ دە زارۆکان درەڤینن و تەڤلی لەشکەریا نەچاری دکن.
ل گۆری چاڤدێران ئارمانجا چەتەیێن ب ناڤێ “جوانێن شۆرەشگەر” ژ رەڤاندنا زارۆکێن تەمەن بچووک، شووشتنا مەژیێ زارۆکان ل گۆر بیردۆزیێن پارتیا کارکەرێن کوردستانێ و تەڤلیکرنا وان د ناڤا رەفێن لەشکەری یێن پارتیێ دەیە.
