رێخستنا “جوانێن شۆرەشگەر” یا سەر ب پارتیا کارکەرێن کوردستانێ (پەکەکێ)ڤە زارۆکەک ژ گوندەکی ناڤچەیا شێراوەیا گوندەوارێ عەفرینێ، ب ئارمانجا تەڤلیکرنا وێ د ناڤا رەفێن پارتیێ دە رەڤاند.
چاڤکانیێن ھەرێمی راگھاندن کو رێخستنا “جوانێن شۆرەشگەر” زارۆکا ب ناڤێ یوسرا عەززەت ژ گوندێ ئەل-زیارە یێ کو د بن کۆنترۆلا ھەڤبەشا ھێزێن رێژیما سووریێ و یەکینەیێن پاراستنا گەلێن گرێدایی پارتیا یەکیتیا دەمۆکراتیک دەیە رەڤاند.
ھەمان چاڤکانیێ راگھاند کو کەچا ب ناڤێ یوسرا د 28ێ تەباخێ دە ھاتیە رەڤاندن و د سالا 2010 دە ژ داییک بوویە.
تێ زانین فەرماندارێ ھێزێن سووریا دەمۆکراتیک مەزلووم کۆبانێ د سالا 2019 دە لگەل ڤێرجینیا گامبا نوونەرا نەتەوێن یەکگرتی بۆ کارووبارێن زارۆکان، ل سەر پەیمانەکێ ئیمزە کربوو، کو ئێدی زارۆکان تەڤلی ھێزێن خوە نەکە و زارۆکێن د ناڤ دە سەربەست بەردە، لێ تا نھا چ پابەندی ب وێ پەیمانێ نەھاتیە کرن، ھەر دەم چەکدارێن ب ناڤ و رەنگێن جودا د ناڤا هەسەدێ دە زارۆکان درەڤینن و تەڤلی لەشکەریا نەچاری دکن.
ل گۆری چاڤدێران ئارمانجا چەتەیێن ب ناڤێ “جوانێن شۆرەشگەر” ژ رەڤاندنا زارۆکێن تەمەن بچووک، شووشتنا مەژیێ زارۆکان ل گۆر بیردۆزیێن پارتیا کارکەرێن کوردستانێ و تەڤلیکرنا وان د ناڤا رەفێن لەشکەری یێن پارتیێ دەیە.
ژ ئالیێ خوە ڤە کۆمیسیۆنا ناڤدەولەتی یا سەربخوەیا لێپرسینێ ژ بۆ سووریێ گۆت کو ھێزێن سووریا دەمۆکراتیک پابەندبوونا خوەیا ژ بۆ نەھشتنا لەشکەرکرنا زارۆکان بنپێ کریە و زارۆکان چەکدار دکە، و د راپۆرتا خوەیا سالانە دە گۆت: لەشکەرکرنا زارۆکێن د بن 18 سالیێ دە ژ ئالیێ کۆمێن چەکدارێن نە سەر ب دەولەتێ ڤە کارەکی قەدەغەیە، و لەشکەرکرنا زارۆکێن ژ 18 سالی بچووکتر دبە سووجێ شەر. ھەر وھا، ھێزێن سووریەیا دەمۆکراتیک بەردەوامە ل سەر بنپێکرنا سۆزێن خوەیێن ژ بۆ نەھشتنا لەشکەرکرنا زارۆکێن د بن 18 سالیێ دە ل ھەرێمێن د بن کۆنترۆلا وان دە.
