پەکەکێ دژاتیا پەدەکێ و بارزانیان کریە ستراتەژیا خوە و د ھەر بوویەرێ دە یان ژی د ھەر داخویانیەکا پەکەکێ دە دڤێت بەحسا پەدەکێ بێ کرن. راستی ئەڤ ھەلوەستا وان د دەربارێ پەدەکێ دە بوویە وەکە پێکەنۆکا. گەلەک تشت ھەنە کو بەلکی رایا گشتی باش نە ئاگاھدارە، لێ ئەگەر بەحسا وان تشتا بێ کرن، ژ ئالیەکی شیرحەرامیا پەکەکێ دەردکەڤە ھۆلێ، ژ ئالیەک دن ڤە دژاتیا پەکەکێ ژ بۆ پەدەکێ وەک پلانەکا دەولەتێن داگیرگەر ئەشکەرە دبە.
پەکەکە ژ ئالیێ دەولەتا ترک ڤە ژ بۆ تەسفیا تەڤگەرا کورد ل باکورێ کوردستانێ ھاتە دامەزراندن. ل رۆژھلاتێ کوردستانێ ھەتا وەک ئیرۆ پشتا خوە دایە دەولەتا ئیرانێ و ژ بۆ بەرژەوەندیێن ئیرانێ تەڤدگەرە و شەرێ پارتیێن رۆژھلاتێ کوردستانێ دکە. ل ئیراقێ دەما سەدام دە پێوەندی ل گەل رەژێما بەعس ھەبوون و دژتیا گەلێ کوردستانێ ل باشوور دکر. پەکەکە وەک چەتەیێن سەدام دکەتە دووڤ پەنابەرێن کورد. ئیرۆ ژی ل کەرکووک و شنگالێ د بن سێبەرا ملیسێن ئیرانێ حەشدا شەعبی دە دژمناتیا قەوارا کوردستانێ دکە. ل رۆژئاڤایێ کوردستانێ، سیاسەتا کو رێڤە دبە ئەوە کو ناڤێ کوردستانێ ژ ھۆلێ رادکە و ئالایێ کوردستانێ قەدەغە کریە. گەلۆ ژ ڤێ پتر ئێدی چ خرابی مایە ل کوردان بکە؟
ھەڤسەرۆکا کۆنسەیا کەجەکێ بەسێ ھۆزات د بەرنامەیەکا کانالا پەکەکێ ستێرک تیڤیێ دە دبێژە: کۆمپلۆیا 9 جۆتمەھا 1998 ب پێشەنگیا ئامەریکا، ئیسرایل و ئینگلیستانێ پێک ھات، ب بیر خست کو پەدەکە و بارزانی ژی ب ئاوایەکی ئاکتیف تەڤلی کۆمپلۆیێ بوونە. بەسێ ھۆزات ئانی زمان کو کۆمپلۆ وێ دەمێ د ئەنجاما تێکۆشینا رێبەرێ گەلێ کورد ئۆجالان، پەکەکێ، گەلێ کورد و دۆستێن وان دە ھات پووچکرن و گۆت، “ھێزێن کۆمپلۆگەر وێ ھەری زێدە د ناڤا 2 سالان دە پەکەکێ خلاس بکن. لێ د ئەنجاما تێکۆشینێ دە نەکارین رێبەر ئاپۆ ب فیزیکی تنە بکن، ھەتا ئیرۆ نەکارین پەکەکێ تەسفیە بکن، نەکارین ڤینا کوردێن ئازاد بشکینن، نەکارین تەسلیم بگرن. گەلێ مە تێکۆشینەک مەزن دا، لەوما کۆمپلۆ نەکاری بگھێژە ئارمانجا خوە.”
یەک بەرسڤا ڤێ گۆتنا بەسێ ھەیە ، کورد دبێژن: تر ل کوودێ، داس ل کوودێ!
پەکەکە بەحسا چ بکە ئیللا دڤێت دژمناتیا خوە یا ل ھمبەر پەدەکێ دیار بکە، ئەڤ نەخوەشیەکە کو، چ جاران نایێ دەرمانکرن.
