ل ھەرێما عەفرینێ د ئەنجاما شەر و پەڤچوونێن د ناڤبەرا گرووپێن چەکدارێن ئۆپۆزیسیۆنا سووریەیێ دە، کەسەک ھات کوشتن و 26 کەسێن دن ژی بریندار بوون.
ل چەند گوندێن عەفرینێ ژ دوھی ڤە شەر و پەڤچوون د ناڤبەرا ھێزەکا ھەڤبەشا ژ گرووپا ھەمزات و ئەمشات ژ ئالیەکی ڤە و گرووپا سقوور ئەل-شەمال ژ ئالیەکی دن ڤە دەرکەتیە.
ل گۆری زانیاریان، د ئەنجاما ڤی شەری دە کەسەک ھاتیە کوشتن و 26 کەس ژی بریندار بوونە کو د ناڤا وان دە ژن و زارۆک ژی ھەنە.
شەر و پەڤچوون د ناڤبەرا جەبھە ئەل-شامیێ و گرووپا سقور ئەل-شەمال ژ ئالیەکی و ھێزێن ھەڤبەش ژ ئالیێ دن ڤە ل گوندێن عەلی کەرا، کەمرووک، کەفەر جەنێ و قەتمێ یێن عەفرینێ دەرکەتیە و رێیا عەزاز و عەفرینێ ژی ھاتیە گرتن.
ل گۆری زانیاریێن رەوانگەھا سووری بۆ مافێن مرۆڤان، ئیستخباراتا ترکیەیێ فەرمان دایە ھێزێن ھەڤبەش و گرووپا سولتان موراد کو ئێرشی ناڤەندا سقور ئەل-شەمالێ بکن، جەبھە ئەل-شامیێ ژی پشتگریا سقور ئەل-شەمال دکە.
نشتەجھێن کامپێن ل نێزی گوندێ کەفەر جەنێ ژی پشتی کو ھەژمارەک ژ تۆپان ل کۆنان کەتن، بانگا راوەستاندنا وی شەری و دەرخستنا خەلکێ ژ کامپان کرن.
ژ دەما داگیرکرنا عەفرینێ ژ ئالیێ ئارتێشا ترکیەیێ و گرووپێن چەکدارێن ئۆپۆزیسیۆنا سووریەیێ ڤە د ئادارا 2018 دە، گەلەک جاران شەر و پەڤچوون د ناڤبەرا چەکداران ب خوە دە دەردکەڤن و خەلکێ سڤیل دبن قوربانیێن وان.
