بەرپرسێ ھلبژارتنێن کوردستانێ ل کۆمسیۆنا ئیراقێ دبێژە، “ئەڤ ھلبژارتن ب ئاوایەکی گەلەک سەرکەفتی ب رێ ڤە چوو و ئامووران ژی ب ئاوایەکی باش کار کر.” ھەروەسا گۆت، “سکالا ھاتنە تۆمارکرن لێ ھەتا نھا رێژەیا وان دیار نینە کا چەندن.”
بەرپرسێ ھلبژارتنێن کوردستانێ ل کۆمسیۆنا بلندا سەربخوەیا ھلبژارتنانا یا ئیراقێ نەبەرد عۆمەر دوھ 18/10/2024 د جڤینەکە چاپەمەنیێ دە راگەھاند، “پرۆسەیا دەنگدانێ ب ئاوایەکی گەلەک سەرکەفتی ب رێ ڤە چوو، ھەروەسا ئەنجام ب ئاوایەکی سەرکەفتی ژ بۆ بەغدایێ ھاتن شاندن و مە چ ئارێشە نەبوون.”
نەبەرد عۆمەر ئاماژە ژی دا، “ئەڤ ھلبژارتن ب ئاوایەکی گەلەک سەرکەفتی ب رێ ڤە چوو و ئامووران ژی ب ئاوایەکی باش کار کر و ئارێشە نەبوون.” ئاماژە ژی دا، “نێزی سێ ھەزار و 750 چاڤدێرێن ناڤدەولەتی و ھەزار و 928 چاڤدێرێن ناڤخوە ژی ل ھەمی بنگەھێن دەنگدانێ ئامادە بوون.” ھەروەسا گۆت، “سکالا ھاتنە تۆمارکرن لێ ھەتا نھا رێژەیا وان دیار نینە کا چەندن.”
ناڤبری د دەرحەقا ئارێشەیا شوونتلیان دە رۆن کر، “دو ئارێشەیێن شوونتلیان ھەنە. یەک؛ کارتا دەنگدانێ کو شوونتلی تێ دە نەبن. دو؛ شوونتلی ل سەر کارتێ ھەنە لێ ل رۆژا دەنگدانێ ژ بەر نەخوەشیێ یان برینداربوونا تلیێن دەنگدەران شوونتلیێن وان نایێن خواندن.”
بەرپرسێ ھلبژارتنێن کوردستانێ ل کۆمسیۆنێ ھەروەسا ژ وەلاتیان دخوازە کو ھەتا دەما دەنگدانێ گرنگیێ بدن تلیێن خوە، ژ بەر کو ئەگەر شوونتلیێن وان نەیێن خواندن، ئەو نکارن دەنگێ خوە بدن.”
بەردەڤکێ کۆمسیۆنێ در. ئەیسەر ژ ئالیێ خوە ڤە رێژەیا تەڤلیبوونێ ل ھەمی پارێزگەھێن ھەرێما کوردستانێ و ھەژمارەکە پارێزگەھێن ئیراقێ راگەھاند، کو ب ڤی ئاوایی بوون:
دھۆک: 98%
ھەولێر: 97%
سلێمانی: 97%
ھەلەبجە: 96%
کەرکووک: 56%
نەینەوا: 43%
دیالا: 62%
بەغدا کەرخ: 79%
بەغدا رەسافە: 60%
سەلاحەدین: 54%
ئەنبار: 8%
در. ئەیسەر ئەشکەرە ژی کر، “ژ 215 ھەزار و 960 دەنگدەرێن تایبەت، 208 ھەزار و 521 کەسان دەنگێ خوە دایە. رێژەیا گشتی یا تەڤلیبوونێ د دەنگدانێ دە ژی 97% بوو.”
پرۆسەیا دەنگدانا تایبەت ژ بۆ ھلبژارتنێن گەرا شەشێ یا پەرلەمانێ کوردستانێ دوھ 18/10/2024 ب تەڤلیبوونا 215 ھەزار ئەندامێن ھێزێن ناڤخوە، وەزارەتا پێشمەرگە و ئەندامێن کوردێن ناڤ ھێزێن ئارتێشا ئیراقێ ب رێ ڤە چوو.
