سەرۆکێ ھەرێما کوردستانێ ب ھەلکەفتا بداویھاتن و سەرکەفتنا ھلبژارتنێن گەرا شەشێ یا پەرلەمانا کوردستانێ پەیامەک پارڤە کر، ئەڤ ژی ناڤەرۆکا وێیە:
وەلاتیێن خوەشتڤی.
گەلی ئالیێن سیاسی و پێکھاتەیێن کوردستانێ یێن رێزدار، ب ھەلکەفتا بداویھاتن و سەرکەفتنا ھلبژارتنێن پەرلەمانا کوردستانێ، ئەز ب گەرمی پیرۆزباھیێ ل تەڤایا گەلێ کوردستانێ ب ھەمی پێکھاتەیێن وێ ڤە دکم. ھلبژارتن و پرۆسەیا دەنگدانێ د بھێزکرنا تەڤگەرا دەمۆکراسیا گەلێ کوردستانێ دە ئاڤێتنا پێنگاڤەکا گرنگ بوو. ئالیکاریا ھەمی ئالیان ژ بۆ بسەرخستن و برێڤەچوونا بێ ئارێشە یا ڤێ پرۆسەیێ جھێ شانازی و رێزێ یە. د ڤێ سەرکەتنێ دە، گەلێ کوردستانێ سەرکەفتیە.
ھلبژارتن نووکرنا رەواتیا دەزگەھێن ھەرێما کوردستانێ و گەھاندنا ئازادانەیا ھزر و دەنگێن وە بوو، ژ بۆ دیارکرنا نوونەرێن وە ل پەرلەمانی. یا کو د جانێ پێشبرکێیا ئاشتیانە و رێژەیا تەڤلیبوونێ یا بەرفرەھا وەلاتیان دە د ناڤ بانگەشە و پرۆسەیا دەنگدانێ دە ھات دیتن وێ یەکێ دسەلمینە کو، گەلێ کوردستانێ ل سەر وێ یەکێ رژدە کو بنگەھێن دەمۆکراسیێ و مافێ خوە ژ بۆ بریاردانێ ل سەر چارەنڤیس و پاشەرۆژا خوە بھێز بکە، ھەروەسا نیشانا زندیتی و زێدەتر ئاڤابوونا چاندا دەمۆکراسیێ یا گەلێ کوردستانێیە.
گەلەک سپاس ژ بۆ وەلاتیێن ھەرێما کوردستانێ، ھەروەسا ژ بۆ بزاڤ و خەباتا ھێزێن ئەولەھیێ، کۆمسیۆنا بلندا سەربخوەیا ھلبژارتنان، حکوومەت و ئالیێن پەیوەندیدارێن ئیراقێ، یونامی و تەڤایا وان ئالیێن کو تەڤلی برێڤەبرن و بسەرخستنا ڤێ پرۆسەیێ بوون. پابەندی و ئالیکاریا وە تەڤان کلیلا ڤێ سەرکەفتنێ بوو. ئەم دەستخوەشیێ ل ھەمیان دکن و رێزێ لێ دگرن.
کرنا ھلبژاتنان ب ئاوایەکی ئارام و شارستانی سەرکەفتنەکا مەزنە کو جیھان ب رێزداری تەماشە دکە، لێ یا کو ڤێ سەرکەفتنێ تەمام دکە و گەلێ کوردستانێ ب دلگەرمی ڤە ل بەندێیە ئەوە کو، پشتی پەژراندنا ئەنجامان ئالیێن سیاسی ب زووترین دەم حکوومەتێ پێک بینن.
حکوومەتەک کو بکارە سەقامگریەکا موکۆمتر و ئابۆرەکا بھێز پەیدا بکە و زێدەتر بەردەوامیێ بدە مافان، پێدڤیتیەکا دەستپێکی یا قۆناغ و ئالنگاریێن نھا و ئاڤاکرنا پاشەرۆژا مەیا ھەڤپارە. ئەو ژی ب جانێ بھەڤرەبوون و تەبایی و ئالیکاریا ھەمی ئالیێن سیاسی و پێکھاتەیان تێ کرن.
سلاڤ ل جانێ پاکژێ شەھیدان.
ئەز داخوازا سەرکەفتنێ ژ بۆ ھەمی ئالیان دکم.
نێچیرڤان بارزانی
سەرۆکێ ھەرێما کوردستانێ
