ئیرۆ سالڤەگەرا تۆمارکرنا دەستانێن سحێلا و مەحموودیێ یە، کو پێشمەرگەیێن کوردستانێ ب قەھرەمانی بەرسڤا گەلەک ئێریشێن بەرفرەھ و مەزنێن نەیارێن کوردستانێ دا و و ئەو تووشی شکەستنەکا مەزن کرن.
د رۆژەکە وەکە ئیرۆ دە پێش 7 سالان ئانکو 26/10/2017 نەیارێن ھەرێما کوردستانێ ل سینۆرێ ئەنیا سحێلا – مەحموودیێ دەست ب ئێریشەکە بەرفرەھ کرن و ھێزێن پێشمەرگەیێن کوردستانێ ب توندی ل ھەمبەر وان بەرخوەدان و بەرسڤا یەک ب یەک ئێریشێن مەزن و بەرفرەھ دان، کو وێ دەمێ دژمن شکەستنەکە مەزن ژیان کر.
ئارمانجا وان ئێریشان برینا سینۆرێن ھەرێما کوردستانێ و مەترسی خستنا سەر پێکھاتەیا ھەرێما کوردستانێ بوو، لێ بەرخوەدانا ھێزێن پێشمەرگەیێن کوردستانێ، ئارمانجا داگیرکەر و نەیاران پووچ کر و یەک ژ دەستانێن دیرۆکی وێ دەمێ ھاتە تۆمار کرن.
سەرۆک بارزانی د رووپەلا 117 یا پرتووکا “ژ بۆ دیرۆکێ”دە نڤیساندیە کو؛ “بەرخوەدانا پێشمەرگە ل ھەموو ئەنیان بەردەوام بوو، ھەتا رۆژا 26 جۆتمەھێ ل ئەنیا مەحموودیێ و سحێلا و ھێزێن ئیراقێ و حەشدا شەعبی ب ھەڤکاریا ھێزێن ئیران و حزبوللاھا لوبنانێ و ب فەرمانداریا راستەراستا ئەفسەرەکی سپاھا پاسدارێن ئیرانێ یێ ب ناڤێ سەید موختار، کو د وی شەری دە بریندار بوو، ب ئارمانجا گرتنا پێشخابور ئێریشی چەپەرێن پێشمەرگە کرن، لێ راستی شکەستنەکا گەلەک مەزن ھاتن.”
سەرۆک بارزانی دبێژە؛ “شەرێ سحێلا یەک ژ بەرخوەدانێن دیرۆکی یێن نوو یێن ھەری مەزن یێن گەلێ کوردستانێ یە. وێ داستانێ گوھەرتن ل سەر ھەڤسەنگیان دە ئانین و دانووستاندنا دەستپێ کرن.”
