رێخستنا چەتە یا ب ناڤێ “جوانێن شۆرەشگەر” یا گرێدایی پارتیا کارکەرێن کوردستانێ، زارۆکەک ژ ھەرێما شەھبا یا ل گوندەوارێ حەلەبێ کو د بن کۆنترۆلا یەکینەیێن پاراستنا گەل یێن سەر ب پارتیا یەکیتیا دەمۆکرات دەیە، ب ئارمانجا تەڤلیکرنا وێ د ناڤ رەفێن پەکەکێ دە رەڤاند.
تۆرا چاڤدێریا مافێن مرۆڤان یا سووریێ راگھاند کو د 24ێ جۆتمەھێ دە، وان رەڤاندنا زارۆکەکا بچووک یا ب ناڤێ جۆدی زەکەریا زیاب یا 11 سالی، ژ باژارۆکێ تل رفعەت یێ ل ھەرێما شەھبایێ بەلگە کریە.
تۆرا چاڤدێریێ یا مافێن مرۆڤان ل سووریێ بانگ ل یونیسێف، جڤاکا ناڤدەولەتی و رێخستنێن ناڤدەولەتی کر کو ئەرکێن خوە ل ھەمبەر زارۆکان جیبجی بکن، و فشارێ ل ھێزێن سووریا دەمۆکراتیک بکن دا کو بنپێکرن و رەڤاندنا زارۆکان راوەستینە و ھەموو زارۆکێن رەڤاندی ڤەگەرینن ناڤا مالباتێن وان، و بەرپرسیارێن رەڤاندنا زارۆکان دەرخینە پێشبەری دادگەھێ.
ل گۆری ئاگاهیان، جوودی زارۆکا ھەشتەمە د مالباتا خوە دە، ناڤێ دایکا وێ فاتما دۆگانە، جوودی د 3 چلەیا 2014 دە ل حەلەبێ ژ دایک بوویە.
تێ زانین فەرماندارێ ھێزێن سووریا دەمۆکراتیک مەزلووم کۆبانێ د سالا 2019 دە لگەل ڤێرجینیا گامبا نوونەرا نەتەوێن یەکگرتی بۆ کارووبارێن زارۆکان، ل سەر پەیمانەکێ ئیمزە کربوو، کو ئێدی زارۆکان تەڤلی ھێزێن خوە نەکە و زارۆکێن د ناڤ دە سەربەست بەردە، لێ تا نھا چ پابەندی ب وێ پەیمانێ نەھاتیە کرن، ھەر دەم چەکدارێن ب ناڤ و رەنگێن جودا د ناڤا هەسەدێ دە زارۆکان درەڤینن و تەڤلی لەشکەریا نەچاری دکن.
ل گۆری چاڤدێران ئارمانجا چەتەیێن ب ناڤێ “جوانێن شۆرەشگەر” ژ رەڤاندنا زارۆکێن تەمەن بچووک، شووشتنا مەژیێ زارۆکان ل گۆر بیردۆزیێن پارتیا کارکەرێن کوردستانێ و تەڤلیکرنا وان د ناڤا رەفێن لەشکەری یێن پارتیێ دەیە.
