درنگیا شەڤا دەرباسبووی چەکدارێن پەکەکێ ل سەر رێیا سەرەکە یا د نێڤبەرا ئامێدیێ بۆ دێرالۆک-شێلادزێ تەقینەک پێکئانی، تەقینێ ب تەنێ زرارێن مادی ل پەی خوە ئانین.
ل گۆر ئاگاهیان، درەنگیا شەڤا دەرباسبوویێ دەردۆرا ساعەت 1:00 شەڤێ، چەکدارێن پەکەکێ بۆمبەیەکە چاندی ل کێلەکا رێیا سەرکە یا د نێڤبەرا ئامیدیێ بۆ دێرالۆک-شێلادزێ ل نێزی گوندێ مێرستەک تەقاندیە، ڤێ تەقینێ زرار ب رێیا سەرەکە، مزگەفتا گوند و هن خانیێن گوندێ مێرستەکێ گهاند، هەر وەها هێلا ئاڤێ و ئینتەرنێتێ ژی قوت کر.
د هن سازیێن مەدیایی دە هات پارڤەکرن کو پەکەکێ ئەڤ بۆمبە ل سەر رێیا کاروانێ لەشکەری یێ ترکیەیێ چاندیە، لێ بەلێ د وێ دەمێ دە ت وەساییتەکە ترکیەیێ د وێ رێیێ دە دەرباس نەبوویە.
چاڤکانیێن خوەجهی ددن خویاکرن، مەبەستا پەکەکێ ژ ڤێ تەقینێ قوتکرنا هێلا ئاڤێ و ئەنترنێتێ بوو ژ وێ دەڤەرێ، کا پەکەکە چما دخوازە ئاڤ و ئینتەرنێتا دەڤەرا ئامەدیێ قوت بکە، هەیانی نها ت ئاگاهی بەر دەست نینە.
