مەزلووم عه‌بدی ئەگەر ئێرشێن تركیێ بەردەوام بکن دێ بەرسڤ دن
فەرماندارێ گشتی یێ هێزێن سووریەیا دەمۆکراتیک (هه‌سه‌ده) مەزلووم عه‌بدی دیار کر کو ئەگەر ئێرش بەردەوام بکن دێ بەرسڤێ بدن ئێرشێن ترکیەیێ.
23یێ ڤێ مەهێ ل ناڤچەیا کاهرامانکازانێ یا ئەنقەرەیێ ئێرشی شرکەتا هەڤپارا پشەسازیا فەزا و هەواڤانیێ یا ترکان (توساش) هات کرن.
ترکیە پشتی ڤێ بوویەرێ ئێرشی باشوور و رۆژئاڤایێ کوردستانێ دکە.
ترکیە ل رۆژئاڤایێ کوردستانێ ئێرشی سانترالێن کارەبا، گاز و پەترۆلێ، بەنزینخانەیان، نەخوەشخانەیان، دەپۆیێن گەنم، هۆلێن داوەتێ و ناڤەندێن تەندورستیێ دکە.
مەزلووم عه‌بدی ل سەر ئێرشان پەیامەکە ڤیدیۆیی بەلاڤ کر و وها گۆت:
گەلێ مەیێ ب روومەت، دۆستێن مەیێن هێژا، ئەڤ 4 رۆژن دەولەتا ترکیەیێ ب شێوازەکە هۆڤانە و بێ سەدەم ئێرشێن خوە ددۆمینە.
د ڤان ئێرشان دە بنەسازیا هەرێمێ، سازیێن گرێدایی، رێڤەبەریا خوەسەر، سازیێن مەدەنی هەدەف دگرە. کەسێن مەیێن سڤیل هەدەف دکە.
د ڤان ئێرشان دە هەتا نها 17 ئینسانێن مە شەهید بوونە. ژ وان تەنێ 2 کەس لەشکەرن.
48 کەس بریندار بوونە و تەنێ ژ وان برینداران 9 کەس ژێ لەشکەرن. ئەو کەسێن دن هەموو سڤیلن.
ئەز ژ بۆ مالباتێن شەهیدان سەرساخیێ دخوازم. ژ بریندارێن مە ژی رە ئەز شفایێ دخوازم.
ئەڤ 5 سالن دەولەتا ترکیەیێ هەول ددە زێدەتر خاکا مە داگر بکە لێ د ڤێ هەولدانێ دە ب سەر نەکەتیە و وێ ب سەر نەکەڤە».
مەزلووم عه‌بدی دیار کر ئارمانجا وان ئێرشان ژ هۆلێ رارکرنا رێڤەبەریا خوەسەرە و وها ئاخڤی:
«هەدەفا بنگەهینا ترکیەیێ ئەوە کو رێڤەبەریا خوەسەر ژ هۆلێ رابکە، ئەولەهی و ئارامیا هەرێمێن مە لاواز بکە و گەلێ مە ژ گون و باژاران کۆچبەر بکە».
ئێرشێن ل سەر هەرێمێن مەنە تەنێ هێزێن مە و گەلێ مە ناکە ئارمانج.
هەر وها ئەو پارتی و هێزێن کو ب مە رە کار دکن، چ هێزێن هەڤپەیمانیا ناڤنەتەوەیی و چ رووسیا بە وان ژی دکە ئارمانج.
مەزلووم عه‌بدی د بەردەوامیا ئاخافتنا خوە ئەشکەرە کر کو ت پێوەندیا وان ب ئێرشا ئەنقەرەیێ رە نینە و وها بەردەوام کر.
«دەولەتا ترکیەیێ ئێرشێن خوەیێن ل سەر هەرێمێن مە ب ئێرشا کو د دەمێن داوی دە ل ئەنقەرەیێ بوویە، گرێددە و ئیدا دکە کو ئێریشکار ژ خاکا سووریەیێ دەرباسی ناڤ ئاخا ترکیەیێ بوونە».
ئەز پشتراست دکم کو ت تێکلی و پێوەندیا هێزێن مە ب ڤێ ئۆپەراسیۆنێ رە نینە.
ت کەسەک ژ ئاخا مە دەرباسی ناڤ ئاخا ترکیەیێ نەبوویە و دەولەتا ترکیێ ژی نکارە ڤێ ئیدایێ پشتراست بکە.
د فەرمانداریا گشتی یا هێزێن مە دە بریارەک هەیە کو ل سەر ئاخا ترکیێ و باکور/ باکورێ کوردستانێ ت ئۆپەراسیۆنێن لەشکەری پێک نەیێن و قادا تێکۆشین و تەڤگەرا مە یا لەشکەری تەنێ قادا سووریەیێ یە.
مەزلووم عه‌بدی ئاماژە ب وێ یەکێ کر کو ئەو دخوازن ناکۆکیێن ب هەموو ئالیان رە ب رێیا دیالۆگێ چارەسەر بکن و ئەڤ ئێریش زەرارێ ددن هەولدانێن دیالۆگێ و خەتەرناکن.
مەزلووم عه‌بدی دیار کر کو ئەگەر ئێرش بەردەوام بکن ئەو ژی نەچارن کو ئاستا بەرسڤا خوە یا رەوا بلند بکن و دێ بەرسڤێ بدن ئێرشان.
