ئیرۆ 10ەمین سالڤەگەرا چوونا پێشمەرگەیێن کوردستانێ بۆ کۆبانێ یە

بەریا 10 سالان دەما کو باژارێ کۆبانێ یێ رۆژئاڤایێ کوردستانێ د بن مەترسیا کەتنا دەستێ رێخستنا تەرۆریستی یا دعشێ دە بوو، ل سەر فەرمانا سەرۆکێ کوردستانێ برێز مەسعوود بارزانی بۆ پاراستنا کۆبانێ ژ مەترسیا رێخستنا تەرۆریستی، رۆژا 28/10/2014 یەکەم کاروانێ پێشمەرگەیێن کوردستانێ ب ئاوایەکی فەرمی ل سەر خاکا باکورێ کوردستانێ رە دەرباسی کۆبانێ بوو.

 ئەڤ یەکەمین جار بوو کو ب ئاوایه‌كێ فەرمی هێزەکە له‌شكه‌ری یا کوردی ل سەر خاكا کۆمارا ترکیێ دەرباسی پەرچەیەکە دن یا کوردستانێ دبە، ئەڤ یەک ب بوویەرەکا دیرۆکی یا هه‌ری گرینگ هاته هه‌ژمار كرن.

دەما گه‌هشتنا کاروانێ پێشمەرگەهان ژ بۆ کۆبانێ، ل وێ ده‌مێ ته‌نێ 20% یا باژاری د دەست شەرڤانان دە مابوو، 80% داعشێ داگیر كربوو، لێ بەلێ ب گهشتنا ھێزێن پێشمەرگەیێن کوردستانێ بۆ کۆبانێ ھەڤسەنگیا ھێزێ هات گوهەرتن.

کاروانێ یەکەم یێ ھێزێن پێشمەرگە د 28ێ جۆتمەھێ دا، کاروانێ دویەم د 3ێ کانوونێ دا و کاروانێ سێیەم ژی د 15ێ چلە دا گەھیشتن کۆبانێ. ل ھەر باژارێ کو کاروانێ پێشمەرگەیان ژ باکورێ کوردستانێ دەرباس دبوو، کوردان ب ئالایێن کوردستانێ و فیشەکێن ھەوایی پێشوازیا پێشمەرگەیان کر.

 پێشمەرگە کارین د دەما 25 رۆژان دا 65% ژ خاکا باژارێ كۆبانێ ڤه‌گه‌رینن کو داعشێ گرتبوو، د دەما 45 رۆژان دە ژی پتر ژ 85% ژ وێ رووبەرا د دەست چەتەیان دا رزگار كرن.

ھێزێن پێشمەرگە کو ھەتا پاقژکرنا کۆبانێ ب تەمامی ژ تەرۆریستێن داعشێ ل کۆبانێ مابوون، پشتی 26ێ چلەیا 2015ێ دەست ب ڤەگەرا بۆ ھەرێما کوردستانێ کرن.

پاش رزگارکرنا کۆبانێ ب دەستی پێشمەرگەیێن لەهەنگ، سەرۆک بارزانی ب ھەلکەفتا رزگارکرنا کۆبانێ ژ دەستێ داعشێ پەیامەک بەلاڤ کر و وەھا گۆت: “ئیرۆ نووچەیێ رزگارکرنا کۆبانێ گەهیشتە دەستێ مە. ڤێ نووچەیێ ھەر کوردستانی و ئازادیخوازەک کەیفخوەش کر. ئەڤ سەرکەفتن سەرکەفتنا ھەموو گەلێ کوردستانێ یە. سەرکەفتنا مرۆڤاھیێ یا ل دژی ھۆڤیتیا تەرۆرێ یە.