سەرۆکێ گشتی یێ پارتییا وەلاتپارێزێن کوردستانێ (PWK) موستەفا ئۆزچەلیک، ب بۆنەیا سالڤەگەرا دەهەمین یا چوونا پێشمەرگە بۆ رزگارکرنا باژارێ کۆبانێ یێ رۆژئاڤا کوردستانێ داخویانیەک دا و راگهاند، ئیرۆ د ناڤبەرا ھەموو کوردێن جیھانێ دە پێویستی ب وێ ھشمەندی و ھەڤگرتنا نەتەوەیی یا کو کۆبانێ رزگار کربوو ھەیە!
داخویانیا موستەفا ئۆزچەلیک وەهایە:
10 سال بەرێ ب ھەڤگرتنا ھەر چار پەرچەیێن کوردستانێ، رێیا رزگارکرنا کۆبانێ ڤەببوو؛ ئیرۆ ژی د ناڤبەرا ھەر چار پەرچەیێن کوردستانێ دە پێویستی ب وێ ھشمەندی و هەستا نەتەوەیی یا وەک وێ دەمێ ھەیە.
داعشا رێخستنا تەرۆریست، رۆژا 13 جۆتمەھا 2014 ، ئێریش بر سەر باژارێ کۆبانێ یێ رۆژاڤایێ کوردستانێ. د ناڤبەینا چەند رۆژان دە، ب قەتلیعامێن مەزن %75ێ ژ کۆبانێ داگیر کر.
د دەمەکە وەھا حەساس دە، پێویستییا گەلێ مەیێ کۆبانێ ب ئالیکاری و پشتگرییا پێشمەرگەیێن کوردستانێ ھەبوو. ب بریارا سەرۆکێ ھەرێما کوردستانێ رێزدار مەسعوود بارزانی و ب داخواز و ئەرێکرنا ئەمەریکا و فرانسایێ دەولەتا ترکییەیێ قەبوول کر کو ھێزێن پێشمەرگە ل سەر باکورێ کوردستانێ را دەرباسی کۆبانێ ببن.
رۆژا 29 جۆتمەھا 2014، ھێزەکا پێشمەرگەیێن ھەرێما کوردستانێ، ب چەکێن خوەیێن گران و سڤک، ژ زاخۆیێ دەرباسی باکورێ کوردستانێ بوو و ژ سەر سلۆپیا، قۆسەر و پرسووسێ دەرباسی کۆبانێ بوو.
گاڤا کو ھێزا پێشمەرگە دەرباسی باکورێ کوردستانێ بووی و بەر ب کۆبانێ ڤە دچوو، ب دەهان هەزار کوردێن زاخۆیێ ھێزا پێشمەرگە ب رێ کرن و ب سەدان ھەزاران کوردێن باکورێ کوردستانێ ب ئالایێن کوردستانێ پێشەوازییا وان کر.
د دیرۆکا کوردستانێ دە جارا یەکەم بوو کو وێنەیەکی وەھا چێدبوو. ب جۆش و ھەستیاری و ھشمەندییەکا نەتەوەیی، نشتمانی، دلێ کوردێن باشوور، باکور، رۆژئاڤا و رۆژھلاتێ کوردستانێ و کوردێن جیھانێ دبوون یەک.
ئەو لەھییا کوردستانییێن باکورێ کوردستانێ یا کو ب کۆنڤۆیا پێشمەرگەیان رە دحەریکی، ل باکورێ کوردستانێ، لەھییا ژ نووڤە ڤەژینا نەتەوەپەروەری و کوردایەتییێ بوو.
ھێزا پێشمەرگە گھیشت کۆبانێ، ئالیکاری و چەکێن پێویست و تەکنیکی دانە یەپەگێ؛ ب ھەڤگرتنا پێشمەرگە و یەپەگێ، ب بەرخوەدانەکا ھێژا، داعشا تەرۆریست شکەستەکە مەزن خوار و کۆبانی ژ داگیرکەرییا داعشێ ھاتە رزگار کرن.
ئیرۆ ل رۆژھلاتا ناڤین ئیحتیمالا کو گوھەرتنێن مەزن چێببن ھەیە و ممکونە کو ئەڤ گوھەرتنە، فرسەندێن مەزن بینن بەر دەرییێ گەلێ مەیێ ھەر چار پەرچەیێن کوردستانێ.
د دەمەکە ئەوقاس حەساس و گرینگ دە، د ناڤبەرا ھەر چار پەرچەیێن کوردستانێ و ھەموو کوردێن جیھانێ دە، پێویستی ب وێ لھەڤخوەدیدەرکەتن، ھەڤپاراستن، ئالیکاری، ھەڤرێزییا کو ب ھشمەندی و ھەستیارییا نەتەوەیی، نشتمانی یا وەکە د دەما رزگارکرنا کۆبانێ دە چێببوو ھەیە. کلیدا سەرکەفتنا گەلێ مەیێ ھەر چار پەرچەیێن کوردستانێ ژی ھەر ئەو هەست، ھشمەندی و لھەڤخوەدیدەرکەتنا ناڤخوەیی یا نەتەوەیی، نشتمانییە.
ئیرۆ پێویستییەکە مەزن ل ھەر پەرچەیەکا کوردستانێ ب تفاق و ھەڤکارییێن نەتەوەیی و دەمۆکراتیک ھەیە؛ ھەروەھا، پێویستی ب سەرکردایەتی، دییالۆگ، ھەڤرێزی، هەڤخەمی و ھشمەندییەکا نەتەوەیی، نشتمانی یا د ناڤبەرا ھەر چار پەرچەیێن کوردستانێ ژی ھەیە.
29/10/2024
موستەفا ئۆزچەلیک
سەرۆکێ گشتی یێ پارتییا وەلاتپارێزێن کوردستانێ (PWK)
