چەکدارێن پەکەکێ دایک و بابێ جوانەکی رۆژهلاتێ کوردستانێ کو ژ بۆی لێکۆلینکرنا ل سەر چارەنڤیسا کورێ خوە سەری ل بارەگەهکێ پەکەکێ ل رۆژهلاتێ کوردستانێ دابوون، ئیشکەنجە کرن و بێ روومەتی ب وان کر.

جوانەکی رۆژهلاتێ کوردستانێ یێ ب ناڤێ “حامد مەنووچەهر حسین”، ژدایکبوویێ 21/8/2006 کو ژ شێنیێن باژارۆکێ سەلماسێ یە، د مەها 3/2024 دە تەڤلی رەفێن پەکەکێ بووبوو، د هەمان رۆژ دە بابێ حامد ژ بۆی لێکۆلینکرنا چارەنڤیسا کورێ خوە دچە چیایێ سەرحەدێ-گوندێ یارمقێ یێ سەر ب باژارێ باکۆیێ ڤە، لێ ل ور راستی بێ حوورمەتی و ئیشکەنجەیەک گران تێ.

د ڤیدەئۆیەکێ دە کو بابێ حامد ب خوە دئاخڤە و ب دەست رووپەلا دارکا مازی کەتیە، بابێ حامد ب ڤی ئاوا چیرۆکا تەڤلیبوونا کورێ خوە، بێ حورمەتی کرن و ئیشکەنجەکرنا خوە و دایکا حامد ب دەستێ چەکدارێن پەکەکێ و قوتبوونا کورێ خوە ژ رەفێن پەکەکێ، دکە:

مەنووچەهر ددە خویاکرن، دەما دگهە چیایێ سەرحەدێ، ل ور هن چەکدارێن پەکەکێ دبینە، پرسا چارەنڤیسا کورێ خوە ژ وان دکە، لێ بەلێ، چەکدارێن پەکەکێ بێ حوورمەتیێ ب وی دکن، گەفان ل وی دخوەن و ژێ رە دبێژن، کورێ تە نە ل جەم مەیە، ت جارەکە دن پرسا وی ژ مە نەکی، جارەکە دن تو ڤەگەری ڤر ئەمێ گولـلەیەکێ ل سینگا تە بدن و تە بکوژن.

چەکدارەکی پەکەکێ ل دایکا حامد خست

مەنووچەهر دبێژە، پاش دەرباسبوونا دو مەهان، جارەکە دن ئەم چوون ور، ڤێ جارێ من دایکا حامد “رازیە” ژی ب خوە رە بر، دەردۆرێن دەمژمێر 6:00ێ ئێڤارێ دو چەکدارێن پەکەکێ یێن ب ناڤێن عەگید و زیلان هاتن جەم مە، چەکدارێ ب ناڤێ عەگید ئێریشی سەر مە کر، ل دایکا حامد خست و ئەو ب زۆرێ خست ناڤا ترومبێلێ دە و ژ مە رە گۆت دڤێ هوون ژ ڤر هەرن، من جلێن خوە چراندن و ژ چەکدارێن پەکەکێ رە گۆت، قەی وە شیرێ ئینسان نەخاریە، چما هوون وسا دکن،  چەکدارا ب ناڤێ زیلان موداخەلە کر و گۆت هەڤالێ مە شاشتی کریە، ئەزێ ڤێ پرسگرێکێ چارەسەر بکم، ئەزێ کورێ وە پەیدا بکم، لێ بەلێ دەرەو ل مە کرن، ئەم خاپاندن، داکو ڤیدەئۆیا وان پارڤە نەکین، مە ڤیدەئۆ رەش کر.

مەنووچەهر دبێژە، ئەم گەلەک جاران چوون جەم چەکدارێن پەکەکێ و مە ژ چارەنڤیسا کورێ خوە پرسی، چەکدارێن پەکەکێ ژ مە رە دگۆ، هوون ب جیێن مە دزانن، ئیران وە دشینە داکو جیهێن مە دەشیفرە بکن، لێ مە ژ وان رە گۆت، ئەم ل کورێ خوە دگەرن، وی نیشانی مە بدن ئەمێ جارەکە دن ڤەنەگەرن جەم وە. ژ مە رە گۆتن، کورێ وە ل باشوورێ کوردستانێ یە.

هەر وەها تەکەز دکە، بەردەوام وان سەرەدانا جیهێن پەکەکێ کریە و هەول دایە کورێ خوە ببینن داکو ڤەگەرینن مالی، پشتی کو ژ مە رە هات گۆتن کورێ وە ژ بۆی باشوور هاتیە شاندن، د رۆژا 4/9/2024 دە ئەم چوون گوندێ تەیمەز ل بنارا چیایێ قەندیلی و ل ور مە چەکدارێن پەکەکێ دیتن و پرسا کورێ خوە ژ وان کر، لێ بەلێ بێ ئەنجام بوو.

کورێ من ژ پەکەکێ قوت بوو

مەنووچەهر دبێژە، د 1/10/2024 دە، کورێ من “حامد” ژ رەفێن پەکەکێ قوت بوویە و کاریە خوە ژ دەستێ چەکدارێن پەکەکێ رزگار بکە و خوە بگهینە سینۆرێ باژارێ سۆران و ل ور خوە رادەستی هێزێن پێشمەرگەیێن کوردستانێ بکە. یەکەم جار پێشمەرگەیان دەست ب لێکۆلینێ کر، پشترە د 10/10/2024ان دە پێشمەرگەیان پەیوەندی ب من کریە و ژ من رە گۆتیە، کورێ وە ژ پەکەکێ قوت بوویە، ئەو ل جەم مەیە و هوون دکارن وەرن کورێ خوە ببن مالێ.

مەنووچەهر رۆژەکی پشتی پەیوەندیا پێشمەرگەیان ب وی، ئانکو رۆژا 11/10/2024 دچە باشوورێ کوردستانێ، ل سەر داخوازا وی پێشمەرگەیێن کوردستانێ کورێ وی تەسلیمی وی دکن و د 13/10/2024 دە ب هەڤ رە ڤەدگەرن رۆژهلاتێ کوردستانێ.