ھەڤسەرۆکێن شارەداریا مێردین، ئێلھ و خەلفەتی یێن سەر ب دەم پارتیێ ژ کار ھاتن دوورخستن و د جیھا وان دە قەیووم ھاتن دانین.
ھەڤسەرۆکێ شارەداریا مێردینێ ئەحمەد تورک و ھەڤسەرۆکا شارەداریا ئێلھێ گولستان سۆنوک و ھەڤسەرۆکێ شارەداریا خەلفەتی یا سەر ب رحایێ محەمەد کارایلان ژ کار ھاتن دوورخستن و د جیھێ وان دە قەیووم ھاتن دانین. ڤێ دەربارێ دە وەزارەتا ناڤخوەیا ترکیێ راگەھاند، ھەڤسەرۆکێ شارەداریا مێردینێ ئەحمەد تورک ژ بەر لێپرسێن و سزایێ گرتیگەھێیێ ژ بەر تەوانا ئەندامتیا رێخستنا تەرۆرێ ژ ئەرک ھاتیە دوورخستن و د جیھا وی دە پارێزگارێ مێردینێ تونجای ئاککۆیون ھاتیە ئەرکدار کرن.
وەزارەتا ناڤخوەیا ترکیێ راگەھاند، ھەڤسەرۆکا شارەداریا ئێلھێ گولستان سۆنوک ژی ژ بەر ئەندامتیا رێخستنا تەرۆرێ جەزا وەرگرتیە و ژ بەر ھەمان تەوانی لێپرسینێن وێیێن بەردەوام دکن ھەنە و ژ بەر وێ ژی ژ ئەرکێ ھەڤسەرۆکاتیا شارەداریا ئێلھێ ھاتیە دوورخستن و د جیھا وێ دە پارێزگارێ مێردینێ ئەکرەم جانالپ وەک وەکیلێ سەرۆکێ شارەدار ھاتیە ئەرکدار کرن.
داخویانیا وەزارەتا ناڤخوەیا ترکیێ دە ھات گۆتن ھەردو ھەڤسەرۆکێن شارەداریێ ژی وەک تەڤدیرەک دەمکی ژ ئەرک ھاتنە دوورخستن.
ھەروەھا ژ ئالیێ دن ڤە ھەڤسەرۆکێ شارەداریا خەلفەتی یا سەر ب پارێزگەھا رحایا باکورێ کوردستانێ مەحمەد کارایلان ژی، ژ بەر سزایێن وی یێن ژ بەر تەوانا ئەندامتیا رێخستنا تەرۆرێ و ھەروەھا دۆزێن وی یێن د وێ چارچۆڤەیێ دە بەردەوام دکن ھەنە و ژ بەر وێ ژی ژ ئەرک ھاتیە دوورخستن و د جیھا وی دە قایمەقامێ خەلفەتیێ ھاکان باشۆگلو وەک وەکیلێ سەرۆکێ شارەداریا خەلفەتیێ ھاتیە ئەرکدار کرن.
