چەکدارێن سولتان محەمەد ئەل-فاتح ده‌ست ب فه‌رزكرنا باجەکە گران ل سەر جۆتکارێن عه‌فرینێ كر كو ب قاسی 3 دۆلاران بۆ هه‌ر دار زه‌یتوونه‌كێ تێ خه‌ملاندن.
هات راگهاندن كو چه‌كدار و ملیشیایێن گرێدایی تركیێ یێن ب ناڤێ چه‌كدارێن سولتان محه‌مه‌د فاتح، جۆتكارێن هه‌رێما عه‌فرێنێ یا رۆژئاڤا كوردستانێ بێزار كرنه و هه‌ری داوی باجه‌كه هه‌ری گران ل سه‌ر وان فه‌رز كری یه.
چاڤكانیێن ل عه‌فرینێ ئاشكه‌ره كرنه، چه‌كدارێن سولتان محه‌مه‌د فاتح 3 دۆلار وه‌كه باج ل سه‌ر هه‌ر دار زه‌یتوونه‌كێ ده‌ستنیشان كرنه.
بریارا وێ کۆمێ ل سەر جۆتکارێن گوندێن ترمیشا، حەج قاسم و مستاشوورایێ هاتیە سەپاندن و ل سەر دارزەیتوونێن ببەر و بێبەر ژی هاتیە فەرزکرن.
ئارتێشا ترکیەیێ و گرووپێن چەکدارێن د کۆنترۆلا وێ دە، 20ێ کانوونا پاشینا 2018ان ژ ئاسمان و بەژاهیێ ڤە ب ئاوایەکی بەرفرەهـ ئێرشی عه‌فرینێ کر کو وێ دەمێ د دەستێ کوردان دە بوو.
پشتی وێ ئێرشا بەرفرەها ب چەکێن گران، باژارێ عه‌فرینێ 18ێ ئادارا 2018ان کەت دەستێ ئارتێشا ترکیەیێ و گرووپێن چەکدار.
د ئەنجاما ئێرشێن گران و داگیرکرنێ دە ب سەد هەزاران کورد ژ مال و ملکێن خوە بوون و کەتن سەر رێ و دربێن کۆچبەریێ.
ژ رۆژا کو عه‌فرین کەتیە بن داگیرکەریا ترکیەیێ ڤە گرتن، بنپێکاریێن وەکی دزی، تالان، تەجاووز، بریندارکرن، کوشتن، رەڤاندن و شکەنجەیێن ل هەمبەری کوردان بەردەوام دکن.
