وەزارەتا ناڤخوەیا ترکیەیێ پارڤە کریە، “د خوەنیشاندان و نەرازیبوونێن باکورێ کوردستانێ دە، 253 کەس ژ بەر رووبرووبوون و بەربارانکرنا ھێزێن ئەولەھیێ ھاتنە دەستەسەرکرن.”
وەزارەتا ناڤخوەیا ترکیەیێ سەرێ سبەھا ئیرۆ (دوشەمبێ، 11/11/2024) ل سەر روودانێن دوورخستنا سەرۆکێن شارەداریێن مێردین، باتمان و خەلفەتیێ یێن باکورێ کوردستانێ و دانانا قەیوومان ل شوونا وان راگەھاندنەک پارڤە کر.
د وێ راگەھاندنێ دە ھاتیە، “253 کەس د ناڤ خوەنیشاندان و دیارکرنا نەرازیبوونێ ل دژی دانانا قەیوومان دە رووبروویی ھێزێن ئەولەھیێ بوونە و توندووتیژی ب کار ئانیە، لەوما ژی ھاتنە دەستەسەرکرن.”
ھەروەسا ئاماژە دایە، “بریارا گرتنێ ژ بۆ 33 کەسان ژ وان 253 کەسێن کو ھاتینە دەستەسەرکرن دەرکەفتیە، پشتی لێکۆلینێ ژ ئالیێ دەستھلاتا دادوەریێ ڤە ب تۆمەتا ‘بانگەشەکرنێ ژ بۆ رێکخستنا تەرۆرستی’، بنپێکرنا قانوونا ھەژمار 2911 ل سەر نەرازینوون و خوەنیشاندان و بەرھنگاربوونا ھێزێن ئەولەھیێ”.
وەزارەتا ناڤخوەیا ترکیەیێ ل رۆژا 4ێ ڤێ مەھێ بریار ل سەر دوورخستنا سەرۆکێن شارەداریێن مێردین، باتمان و خالفەتیێ و دانانا قەیوومان ل جھێن وان دا، ھەروەسا ژ بۆ دەما 10 رۆژان ھەمی چالاکیێن سڤیل ژی ھاتن قەدەغەکرن.
ل دژی بریارا وەزارەتا ناڤخوەیا ترکیەیێ، د چەند رۆژێن بۆری دە گەلەک چالاکیێن نەرازیبوونێ و خوەنیشاندان ل بەرانبەری ئاڤاھیێن شارەداریێن وان ھەر سێ باژارێن باکورێ کوردستانێ ب رێ ڤە چوون و ئالیگرێن دەم پارتیێ داخوازا ھلوەشاندنا وان بریاران دکن.
