د بوویه‌را چیایێ شه‌نگالێ ده، كادرۆیه‌كا هه‌والگیریا په‌كه‌كێ جوانه‌كی ئێزدی دا كوشتن
د ئێریشا دوهـ یا كو ل چیایێ شه‌نگالێ ئۆتۆمۆبیله‌ك تێ ده هاتیه هه‌ده‌ف گرتن، جوانه‌كی ئێزدی یێ ته‌مه‌ن 17 سال ب ناڤێ كه‌ریم هات كوشتن، ئه‌ڤ جوانێ ئێزدی بوو قوربانیێ کادرویەکا ژن یا پەکەکێ، پشتی كو خاپاندی و پشتره به‌رێ وی دایه مرنێ.
دوهـ رۆژا یه‌كشه‌می 10 مژدارا 2024ێ ل دانێ ئێڤارێ، درۆنێن تركیێ ئۆتۆمۆبیله‌ك ل چیایێ شه‌نگالێ بۆردۆمان كر، هات راگهاندن دو كه‌سان تێ ده ژیانا خوه ژ ده‌ست دا. داركا مازی ئاگاهیێن تایبه‌ت ده‌ر بارێ ناسنامه‌یا قوربانییان ده‌ست خستنه، یێك ژێ جوانه‌كی ئێزدی یه و كادرۆیه‌كا هه‌والگیرییا په‌كه‌كێ ئه‌و خاپاندبوو.
په‌كه‌كێ جوانێ ئێزدی كه‌ریم خاپاند و دا كوشتن
ل ساعه‌ت 3 ئێڤارا دوهـ ئۆتۆمۆبیله‌كه ژجورێ (کیا سیراتو) ل چه‌پێن چیایێ شه‌نگالێ بوویە هه‌ده‌فا بالافرێن ئارتێشا تركیێ، پشتی ئێریشێ ده‌ركه‌ت هۆلێ كو جوانه‌كی ئێزدی یێ ب ناڤێ «که‌ریم حه‌جی شه‌رۆ» تەمەن 17 سال، ژهوزا کورکورکی و ژ شێنیێن گوندێ گابارا، هه‌ر وها كادرۆیه‌كه ژن یا هه‌والگیرییا په‌كه‌كێ تێ ده هاتنه كوشتن.
چاڤكانیێن داركا مازی ئه‌شكه‌ره كرن، كادرۆیا هه‌والگیرییا په‌كه‌كێ كو د ئێریشێ ده هاتیه كوشتن، جوانێ ئێزدی كه‌ریم خاپاندبوو و كه‌ریم وه‌كه شۆفێر ژ بۆی خوه ئه‌ركدار كربوو.
پەکەکێ د مه‌دیایا خوه ده ووسا دایە دیار کرن کو بالافرێن تركیێ گه‌لێ سڤیل یێ ئێزدی هه‌ده‌ف دگرن، لێبه‌لێ بوویەرێن ڤەشارتی یێن ل پشت بۆردومانا وێ ئۆتۆمۆبیلێ ب نهێنی هشتنه و راستیا بابەتی ئه‌شكه‌ره نه‌كریه کو کادرویەکا ژ باکورێ كوردستانێ و ئەنداما هەوالگیرییا رێخستنێ ژی د ئێریشێ ده بوویه هاتیه كوشتن.
9 سالن په‌كه‌كه به‌رێ جوانێن ئێزدی دده مرنێ
چاڤكانیێن مه ده‌ستنیشان كرن، پەکەکە ب دارێ زۆرێ جوانێن ئێزدی ل شه‌نگالێ ته‌ڤلی ره‌فێن خوه دكن و خه‌ته‌ریه‌كه مه‌زن دخن سه‌ر ژیانا وان، په‌كه‌كه جوانێن ئێزدی دخه خزمه‌تا كادرۆیێن خوه ده و ب ڤێ یه‌كێ ئه‌و دبنه هه‌ده‌فا بۆردومانێن ئارتێشا تركیێ.
پشتی ل مژدارا سالا 2015ێ شه‌نگال ژ هێلا هێزێن پێشمه‌رگه ڤه ژ زۆرا داعشێ هاتیه رزگار كرن، رێخستنا په‌كه‌كێ كه‌تیه د شه‌نگالێ ده، ژ وێ ده‌مێ ڤه په‌كه‌كێ جوانێن ئێزدی دخاپینه و ته‌ڤلی ره‌فێن خوه دكه و پشتره به‌رێ وان دده مرنێ، لوما ژی دڤێ ئێدی گه‌لێ ئێزدی تایبه‌ت ل شه‌نگالێ ژ ته‌وانێن په‌كه‌كێ ره ببێژه به‌سه، و حه‌سابا خوینا ته‌ڤ جوانێن خوه ژ ڤێ رێخستنا دژه كورد بپرسن.
