سەرۆکێ حکوومەتا هەرێما کوردستانێ پێشوازیا سەرۆکوەزیرێ ئیراقێ دکە و پێ رە دانووستاندنان ل سەر هن مژارێن گرنگ دکە.
سەرۆکێ حکوومەتا هەرێما کوردستانێ مەسروور بارزانی ئیرۆ (چارشەم، 13.11.2024) ل بالافرخانەیا ناڤدەولەتی یا هەولێرێ پێشوازیا سەرۆکوەزیرێ ئیراقێ محەمەد شه‌یاع سوودانی کر.
حکوومەتا هەرێما کوردستانێ د راگەهاندنەکێ دە ئاماژە دایە، «سەرۆکوەزیرێ ئیراقێ سەرکەفتنا هلبژارتنێن پەرلەمانا کوردستانێ ل سەرۆکێ حکوومەتا هەرێما کوردستانێ پیرۆز کر و ئاماژە دا کو سەقامگریا سیاسی یا هەرێما کوردستانێ بنگەهەکە گرنگا سەقامگریا هەمی ئیراقێ یە. سەرۆکوەزیرێ ئیراقێ هەروەسا تەکەز ل سەر گرنگیا پێکانینا کابینەیا نوو یا حكوومه‌تا هەرێما کوردستانێ ژی کر، پێخەمەتی زێدەتر پێشخستنا ئالیکاری و هەڤاهەنگیێن ناڤبەرا حكوومه‌تا هەرێما کوردستانێ و حكوومه‌تا فەدەرالی».
وەکی کو ئاماژە پێ هاتیە دان، د وێ جڤینێ دە «دانووستاندن ل سەر ئارێشە و پرسێن گرێدایی مووچە و پشکا هەرێما کوردستانێ د بودجەیا گشتی یا فەدەرالی دە، دەستپێکرنا هناردەکرنا پەترۆلا هەرێما کوردستانێ و ئامادەکاریێن سەرهەژمێریا گشتی یا شێنیان ل ئیراقێ هاتن کرن».
سەرۆکێ حكوومه‌تا هەرێما کوردستانێ د دەرهەقا پرسا مووچەیان دە «تەکەز ل سەر پێدڤیتیا دوورخستنا پرسا خەرجکرنا مووچەیێن هەرێما کوردستانێ ژ هەر دوبەرەکیەکە سیاسی کر، ل بەر رۆناهیا بریارا دادگەها بلندا فەدەرالی، وەکی دەڤەرێن دنێن ئیراقێ».
سەرۆکوەزیر مەسروور بارزانی د دەرهەقا دەستپێکرنا هناردەکرنا پەترۆلا هەرێما کوردستانێ دە ژی «تەکەز ل سەر گرنگیا دەستپێکرنا پرۆسەیا هناردەکرنا پەترۆلێ ب زووترین دەم و نەهێلانا ئاستەنگ و ئارێشەیێن د رێیا وێ پرۆسەیێ دە هات کرن، ب ئاوایەکی کو د بەرژەوەندیا تەڤایا وەلاتیێن ئیراقێ دە بە».
تەوەرەکی دنێ وێ جڤینێ گرێدایی سەرهەژمێریا گشتی یا شێنیان ل ئیراقێ بوو، هەر دو ئالی د ڤی واری دە ل سەر بسەرخستنا وێ پرۆسەیێ ژ بۆ مەرەما پێشخستنێ هەڤنەرین بوون، ب لبەرچاڤوەرگرتنا تێبینیێن هەرێما کوردستانێ د ڤی واری دە.
